لبنان: حزب اللہ کا اسرائیل پر ڈرونز حملہ

یروشلم (ڈیلی اردو) اسرائیلی فوج نے کہا ہے کہ اتوار کے روز لبنان سے داغے گئے حزب اللہ کے مبینہ تین ڈرون شمالی اسرائیل میں مختلف مقامات پر گرے، تاہم ان حملوں میں کوئی جانی نقصان نہیں ہوا۔

اسرائیلی فوج کا کہنا ہے کہ ان حملوں میں کسی شخص کے ہلاک یا زخمی ہونے کی کوئی اطلاع نہیں ہے۔ ان حملوں کے بعد اسرائیل کی انتہائی دائیں بازو کی حکومت کے دو وزراء نے بیروت کے جنوبی مضافاتی علاقے ضاحیہ پر جوابی حملوں کا مطالبہ کیا ہے۔ ضاحیہ، بیروت کا وہ علاقہ ہے جو حزب اللہ کا مضبوط گڑھ سمجھا جاتا ہے۔

اسرائیلی وزیر خزانہ بیزالل اسماٹرچ نے سوشل میڈیا پلیٹ فارم ایکس پر لکھا، ’’شمالی آبادیوں پر حملے وزیراعظم کی اعلان کردہ ضاحیہ ڈاکٹرائن کا امتحان ہے۔ میں ان سے مطالبہ کرتا ہوں کہ اسے پوری قوت اور فیصلہ کن انداز میں نافذ کریں اور ضاحیہ میں عمارتیں گرا دیں۔‘‘

اسی طرح قومی سلامتی کے وزیر اتمار بین گویر نے کہا، ’’ہر ڈرون کے بدلے ایک میزائل، ہر خلاف ورزی کے بدلے گولہ باری اور ہر بغیر پائلٹ طیارے کے بدلے ضاحیہ کو لرزنا چاہیے۔‘‘

اسرائیلی حکام، جن میں وزیر اعظم بینجمن نیتن یاہو بھی شامل ہیں، پہلے ہی خبردار کر چکے ہیں کہ اگر حزب اللہ شمالی اسرائیل کی آبادیوں کو نشانہ بناتی ہے تو اسرائیل ضاحیہ پر حملے کرے گا۔

اسرائیلی حکومت کا دعویٰ ہے کہ اس پالیسی کو واشنگٹن کی حمایت حاصل ہے۔ ادھر اسرائیلی فوج نے جنوبی لبنان کے 29 دیہات کے مکینوں کو فضائی حملوں سے قبل فوری انخلا کی وارننگ جاری کر دی ہے۔

یہ اقدام اس جنگ بندی کے باوجود کیا گیا ہے جس کا مقصد حزب اللہ اور اسرائیل کے درمیان جاری جنگ کو روکنا تھا۔

حالیہ ہفتوں میں دونوں فریقوں کے درمیان جنگ بندی کی متعدد خلاف ورزیاں رپورٹ ہو چکی ہیں، جس کے باعث سرحدی علاقوں میں کشیدگی مسلسل برقرار ہے اور وسیع تر تصادم کے خدشات دوبارہ بڑھ رہے ہیں۔