لبنان: حزب اللہ کے حملے میں اسرائیلی لیفٹیننٹ کرنل سمیت چار فوجی ہلاک

یروشلم (ڈیلی اردو) اسرائیلی فوج نے تصدیق کی ہے کہ لبنان میں جاری جھڑپوں کے دوران اس کے چار فوجی ہلاک ہوگئے ہیں، جن میں لیفٹیننٹ کرنل ڈور گیڈالیا بن سمہون بھی شامل ہیں۔ 

اسرائیلی دفاعی افواج (آئی ڈی ایف) کے مطابق چاروں اہلکار "لڑائی کے دوران اپنی خدمات انجام دیتے ہوئے" ہلاک ہوئے، تاہم فوج نے یہ واضح نہیں کیا کہ یہ واقعہ کب اور کس مقام پر پیش آیا۔

آئی ڈی ایف نے ایک علیحدہ بیان میں کہا کہ جنوبی لبنان میں ایک ڈرون حملے کے دوران ایک ریزرو فوجی افسر شدید زخمی ہوگیا، جبکہ چار دیگر اسرائیلی فوجی معمولی زخمی ہوئے۔

دوسری جانب لبنان کی وزارتِ صحت نے بتایا کہ جمعہ کو جنوبی لبنان پر اسرائیل کے تازہ فضائی حملوں میں 47 افراد ہلاک جبکہ 97 زخمی ہوگئے۔ وزارت کے مطابق یہ ہلاکتیں آدھی رات سے جمعہ کی دوپہر تک ہونے والے حملوں کے دوران ہوئیں۔

وزارتِ صحت کے بیان میں کہا گیا کہ اسرائیلی جنگی طیاروں نے گزشتہ رات سے جمعہ کی صبح تک جنوبی لبنان کے مختلف علاقوں میں شدید فضائی حملے کیے، جن کے باعث امدادی سرگرمیاں بھی متاثر ہوئیں اور ہلاک و زخمی افراد کو ملبے سے نکالنے میں مشکلات پیش آئیں۔

بیان کے مطابق جنوبی لبنان کے کم از کم 10 دیہات اور قصبوں کو نشانہ بنایا گیا۔ ابتدائی اطلاعات کے مطابق ان حملوں میں متعدد شہری ہلاک اور زخمی ہوئے، جبکہ بعد ازاں مجموعی ہلاکتوں کی تعداد 47 اور زخمیوں کی تعداد 97 تک پہنچ گئی۔

اسرائیل اور حزب اللہ کے درمیان یہ جھڑپیں ایسے وقت میں جاری ہیں جب ایران اور امریکہ کے درمیان عبوری جنگ بندی کے بعد خطے میں کشیدگی میں کمی کی توقع کی جا رہی تھی۔ تاہم جنوبی لبنان میں جاری لڑائی نے ان توقعات کو دھچکا پہنچایا ہے۔

اسرائیل کا کہنا ہے کہ وہ حزب اللہ کے خلاف اپنی فوجی کارروائیاں ضرورت پڑنے پر جاری رکھے گا، جبکہ حزب اللہ بھی جنوبی لبنان میں موجود اسرائیلی فوجی اہداف پر حملے جاری رکھے ہوئے ہے، جس کے باعث سرحدی علاقوں میں کشیدگی برقرار ہے۔