لبنان پر حملے: ایران-امریکہ جنگ بندی معاہدے میں بڑی دراڑیں پڑ گئیں

واشنگٹن (ڈیلی اردو/روئٹرز/اے پی/اے ایف پی) امریکہ، اسرائیل اور تہران کے مابین ایران جنگ میں دو ہفتے کی فائر بندی کا معاہدہ ایک نازک ڈیل ہے، جس میں لبنان پر شدید اسرائیلی حملوں سے دراڑیں پڑتی جا رہی ہیں۔ تہران نے اسرائیل کو جوابی عسکری اقدامات کی دھمکی بھی دی ہے۔

ایران جنگ میں عالمی وقت کے مطابق بدھ سات اپریل کو علی الصبح تینوں جنگی فریقوں کے مابین دو ہفتے کی عبوری اور مشروط فائر بندی کا ایک ایسا معاہدہ طے پا گیا تھا، جس کے لیے ثالثی پاکستان نے کی تھی اور جس کے ساتھ ہی امریکہ کے صدر ڈونلڈ ٹرمپ نے توانائی کی ایرانی تنصیبات پر تباہ کن فضائی حملوں کی اپنی دھمکی پر عمل درآمد مؤخر کر دیا تھا۔

لیکن اس سیزفائر ڈیل کے اعلان کے چند ہی گھنٹے بعد اسرائیل نے لبنان میں ایران نواز شیعہ ملیشیا حزب اللہ کے ٹھکانوں پر شدید اور انتہائی ہلاک خیز حملوں کی ایک بھرپور لہر کا آغاز کر دیا تھا، جس دوران محض 10 منٹ کے اندر اند ر حزب اللہ کے 100 سے زائد اہداف کو بیروت، جنوبی لبنان اور وادی بیقا میں نشانہ بنایا گیا تھا۔