لندن میں یہودی عبادت گاہ پر آتش زنی کی ایک اور کوشش

لندن (ڈیلی اردو/بی بی سی) لندن کے شمال مغربی علاقے میں ایک یہودی عبادت گاہ (سیناگاگ) کو ایک اور آتشزنی کی کوشش کا نشانہ بنایا گیا ہے۔ گزشتہ ایک ماہ کے دوران اس علاقے میں یہودی املاک پر آتشزنی کے متعدد واقعات رپورٹ ہو چکے ہیں۔

کمیونٹی سکیورٹی ٹرسٹ کے مطابق ہفتے کی رات ہیرو (Harrow) میں واقع کینٹون یونائیٹڈ سیناگاگ میں پیش آنے والے واقعے سے ایک اندرونی کمرے کو دھوئیں سے معمولی نقصان پہنچا، تاہم کوئی جانی نقصان نہیں ہوا اور عمارت محفوظ رہی۔

ترجمان نے کہا کہ اس سے قبل فنچلے، گولڈرز گرین اور ہینڈن میں بھی یہودی برادری کو نشانہ بنانے کے اسی نوعیت کے واقعات پیش آ چکے ہیں۔

برطانوی وزیر اعظم کیئر اسٹارمر نے واقعات کی مذمت کرتے ہوئے کہا کہ یہ قابلِ نفرت عمل ہے اور اسے ہرگز برداشت نہیں کیا جائے گا۔ انہوں نے کہا کہ یہودی برادری پر حملے دراصل برطانیہ پر حملے ہیں اور مجرموں کے خلاف سخت کارروائی کی جائے گی۔