لکی مروت: امن کمیٹی کے اجلاس پر کواڈ کاپٹر حملہ، 13 افراد زخمی

لکی مروت (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع لکی مروت کے علاقے خیروخیل پکہ میں قیامِ امن سے متعلق جاری ایک اہم اجلاس کے دوران نامعلوم دہشت گردوں نے کواڈ کاپٹر کے ذریعے حملہ کیا، جس میں امن کمیٹی کے صدر خالد خان کے حجرے کو نشانہ بنایا گیا۔

پولیس ذرائع کے مطابق حملے کے نتیجے میں متعدد افراد زخمی ہوگئے، جن میں امن کمیٹی کے صدر خالد خان کے والد بھی شامل ہیں۔

واقعے کے فوراً بعد زخمیوں کو ڈسٹرکٹ ہیڈکوارٹر ہسپتال لکی مروت منتقل کیا گیا۔ 

ہسپتال ذرائع کے مطابق اب تک 13 زخمیوں کو لایا جا چکا ہے، جن میں سے بعض کی حالت تشویشناک بتائی جا رہی ہے، جبکہ شدید زخمیوں کو مزید علاج کے لیے بنوں ریفر کیا جا رہا ہے۔

حملے کے بعد علاقے میں خوف و ہراس پھیل گیا اور سکیورٹی اداروں نے فوری طور پر علاقے کو گھیرے میں لے کر سرچ آپریشن شروع کر دیا ہے۔