لکی مروت اور پشاور میں دہشت گرد حملے، 7 پولیس اہلکاروں سمیت 20 افراد زخمی

لکی مروت /پشاور (نمائندگان ڈیلی اردو)  پاکستان کے شورش زدہ صوبے خیبرپختونخوا کے ضلع لکی مروت اور صوبائی دارالحکومت پشاور میں دہشت گردانہ حملوں کے واقعات پیش آئے، جن میں مجموعی طور پر سات پولیس اہلکار اور 20 شہری زخمی ہوئے۔

لکی مروت کے علاقے نورنگ میں پولیس موبائل کو مسلح افراد نے سبزی منڈی کے قریب نشانہ بنایا، جس میں بم کو موٹرسائیکل میں نصب کر کے دھماکے کے لیے استعمال کیا گیا۔ اس حملے میں چار پولیس اہلکاروں سمیت بارہ دیگر افراد زخمی ہوئے، جن میں تین معصوم بچے بھی شامل ہیں۔ 

زخمیوں کو فوری طور پر تحصیل ہیڈ کوارٹر اسپتال سرائے نورنگ منتقل کر دیا گیا، اور ایک شدید زخمی کو بہتر علاج کے لیے بنوں منتقل کیا گیا ہے۔

پولیس اور سکیورٹی فورسز نے فوری طور پر جائے وقوعہ پر پہنچ کر شواہد اکھٹے کیے اور دہشت گردوں کی تلاش کے لیے آپریشن شروع کیا۔ 

ابتدائی معلومات کے مطابق حملہ آور دھماکے کے فوراً بعد جائے وقوعہ سے فرار ہونے میں کامیاب ہو گئے۔

اسی دوران پشاور کے نواحی علاقے متنی میں بھی پولیس چیک پوسٹ پر دہشت گردوں نے حملہ کیا، جس میں چار پولیس اہلکار زخمی ہوئے۔ 

پولیس کی جوابی کارروائی کے بعد حملہ آور فرار ہونے میں کامیاب ہوئے۔