لکی مروت میں سیکیورٹی فورسز کی کارروائی، 2 دہشت گرد ہلاک

لکی مروت (ڈیلی اردو رہورٹ) پاکستان کے شورش زدہ صوبہ خیبرپختونخوا کے ضلع لکی مروت میں پاک فوج نے خفیہ اطلاعات کی بنیاد پر بڑی کارروائی کرتے ہوئے سرائے نورنگ حملے میں ملوث دو دہشت گردوں کو ہلاک جبکہ ایک کو زخمی کر دیا۔

تفصیلات کے مطابق کارروائی لکی مروت کے علاقے کیچی کمر میں کی گئی، جہاں سیکیورٹی فورسز نے دہشت گردوں کے مبینہ ٹھکانے کو نشانہ بنایا۔

سیکیورٹی ذرائع کے مطابق ہلاک دہشت گردوں میں نصیر عرف علقمہ حقانی اور اکرام حسین شامل ہیں۔ نصیر عرف علقمہ حقانی ولد یوسف خان قوم موچی، وانڈہ امیر کا رہائشی تھا جبکہ اکرام حسین کا تعلق تاجہ زئی سے بتایا گیا ہے۔

ابتدائی تحقیقات کے مطابق ہلاک دہشت گرد سرائے نورنگ بم دھماکے میں براہِ راست ملوث تھے، جبکہ اس کارروائی کو حملے کے سہولت کاروں تک رسائی کے حوالے سے اہم پیش رفت قرار دیا جا رہا ہے۔

ذرائع کے مطابق دہشت گرد نیٹ ورک کا سراغ خفیہ معلومات اور جدید تکنیکی ذرائع کی مدد سے لگایا گیا، جس کے بعد سیکیورٹی فورسز نے فوری کارروائی کرتے ہوئے دہشت گردوں کے ٹھکانے کو نشانہ بنایا۔

پاک فوج نے کارروائی کے بعد ہلاک دہشت گردوں کی لاشیں تحویل میں لے لیں جبکہ علاقے میں سرچ آپریشن بھی جاری رکھا گیا تاکہ ممکنہ سہولت کاروں اور دیگر عناصر کو گرفتار کیا جا سکے۔

سیکیورٹی حکام کا کہنا ہے کہ دہشت گردی کے خاتمے کے لیے کارروائیاں پوری قوت کے ساتھ جاری رہیں گی اور عوام کے جان و مال کے تحفظ کو ہر صورت یقینی بنایا جائے گا۔