لکی مروت میں سی ٹی ڈی کا آپریشن، 6 دہشت گرد ہلاک

لکی مروے (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع لکی مروت میں کاؤنٹر ٹیررازم ڈیپارٹمنٹ (سی ٹی ڈی) نے انٹیلی جنس بیسڈ آپریشن کے دوران 6 دہشت گردوں کو ہلاک کر دیا، جبکہ ان کے قبضے سے بھاری مقدار میں اسلحہ اور دھماکہ خیز مواد برآمد کر لیا گیا۔

سی ٹی ڈی حکام کے مطابق کارروائی تھانہ گمبیلا کی حدود میں واقع شاگئی کے علاقے میں دہشت گردوں کی موجودگی کی مصدقہ اطلاع پر کی گئی۔ آپریشن میں سی ٹی ڈی کی اسپیشل ویپنز اینڈ ٹیکٹکس (سواٹ) ٹیم نے حصہ لیا۔

ذرائع کے مطابق جیسے ہی سواٹ ٹیم علاقے میں پہنچی تو دہشت گردوں نے فورسز کو دیکھتے ہی فائرنگ شروع کر دی۔ جوابی کارروائی میں سی ٹی ڈی اہلکاروں نے بھرپور فائرنگ کی اور دونوں جانب سے تقریباً 40 منٹ تک فائرنگ کا تبادلہ جاری رہا۔

فائرنگ رکنے کے بعد علاقے میں سرچ آپریشن کیا گیا تو 6 دہشت گرد ہلاک حالت میں پائے گئے، جبکہ ان کے دیگر ساتھی فرار ہونے میں کامیاب ہو گئے۔ ابتدائی اطلاعات کے مطابق ہلاک عسکریت پسند علاقے میں خوف و ہراس کی علامت سمجھے جاتے تھے۔

سی ٹی ڈی کے مطابق ہلاک افراد کی شناخت کا عمل جاری ہے اور شناخت مکمل ہونے کے بعد ان کے سہولت کاروں اور دیگر ساتھیوں کے خلاف بھی کارروائی کی جائے گی۔

کارروائی کے دوران دہشت گردوں کے قبضے سے 4 کلاشنکوفیں بمعہ 10 میگزین اور 43 کارتوس، 2 عدد 9 ایم ایم پستول بمعہ 4 میگزین اور 7 کارتوس، 8 ہینڈ گرینیڈ، 4 بنڈولیئر اور ایک آئی ای ڈی برآمد کی گئی۔