لکی مروت میں گیس پائپ لائن تباہ، سوات میں دستی بم دھماکہ

سوات/لکی مروت (نمائندگان ڈیلی اردو) پاکستان کے شورش زدہ صوبے خیبر پختونخوا کے ضلع لکی مروت میں عسکریت پسندوں نے گیس کی مین سپلائی لائن کو دھماکہ خیز مواد سے اڑا دیا۔ 

پولیس کے مطابق واقعہ تھانہ سٹی کی حدود بھانہ منجیوالا کے قریب پیش آیا، جہاں عسکریت پسندوں نے ٹی بی ایس اور گیس ترسیلی لائن کو نشانہ بنایا۔ 

دھماکے کے نتیجے میں بڑی مقدار میں گیس کا اخراج شروع ہو گیا جبکہ پائپ لائن میں آگ بھڑک اٹھی، جس کے شعلے دور دور تک دکھائی دیے۔ 

واقعے سے علاقے میں خوف و ہراس پھیل گیا اور ہزاروں گھروں کو گیس کی فراہمی معطل ہو گئی۔

سوات

دوسری جانب ضلع سوات کے علاقے کبل میں دستی بم پھٹنے سے ایک بچہ ہلاک جبکہ دوسرا زخمی ہو گیا۔ 

پولیس کے مطابق بچے کھیل کے دوران زنگ آلود ہینڈ گرنیڈ سے کھیل رہے تھے کہ اچانک دھماکہ ہو گیا۔ ہلاک بچے کی لاش اور زخمی بچے کو فوری طور پر کبل اسپتال منتقل کر دیا گیا۔ 

پولیس نے جائے وقوعہ سے شواہد اکٹھے کر کے واقعے کی مزید تفتیش شروع کر دی ہے۔