لکی مروت: ٹارگٹ کلنگ کے واقعے میں چھٹی پر آئے ایف سی اہلکار ہلاک

لکی مروت (ڈیلی اردو) پاکستان کے شورش زدہ صوبہ خیبرپختونخوا کے ضلع لکی مروت میں ایک اور دہشت گرد حملے میں فرنٹیئر کور (ایف سی) کا ایک اہلکار ہلاک ہو گیا۔

پولیس کے مطابق یہ واقعہ ضلع لکی مروت کے علاقے شاہ حسن خیل میں پیش آیا، جہاں نامعلوم حملہ آوروں نے فائرنگ کرکے ایف سی اہلکار کو نشانہ بنایا۔

پولیس نے بتایا کہ ہلاک ہونے والے اہلکار کی شناخت بلقیاز ولد ممتاز کے نام سے ہوئی ہے، جن کا تعلق مستی خیل سے تھا۔ وہ بلوچستان ایف سی میں خدمات انجام دے رہے تھے اور ان دنوں چھٹی پر اپنے آبائی علاقے آئے ہوئے تھے۔

حکام کے مطابق بلقیاز ذاتی کام کے سلسلے میں شاہ حسن خیل گئے تھے، جہاں دہشت گردوں نے ان پر فائرنگ کر دی۔ حملے کے نتیجے میں وہ موقع پر ہی ہلاک ہوگئے، جبکہ حملہ آور فرار ہونے میں کامیاب ہو گئے۔

واقعے کے بعد پولیس کی بھاری نفری موقع پر پہنچ گئی اور علاقے کو گھیرے میں لے کر سرچ آپریشن شروع کر دیا۔ ملزمان کی گرفتاری کے لیے مختلف مقامات پر چھاپے بھی مارے جا رہے ہیں۔

پولیس کا کہنا ہے کہ گزشتہ شب بھی دہشت گردوں نے شاہ حسن خیل میں واقع ایک گرلز مڈل اسکول کو دھماکے سے تباہ کر دیا تھا، جس کے بعد علاقے میں سیکیورٹی مزید سخت کر دی گئی ہے۔

حکام کے مطابق دونوں واقعات کے درمیان ممکنہ تعلق سمیت مختلف پہلوؤں سے تحقیقات جاری ہیں، جبکہ علاقے میں سرچ اور نگرانی کا عمل بھی تیز کر دیا گیا ہے۔