لکی مروت: پولیس آپریشن میں زخمی اہلکار سعید خان دم توڑ گیا

لکی مروت (ڈیلی اردو)پاکستان کے شورش زدہ صوبے خیبر پختونخوا کے ضلع لکی مروت میں پولیس کے آپریشن کے دوران زخمی ہونے والے اہلکار کانسٹبل سعید خان زخمیوں کی تاب نہ لاتے ہوئے ہسپتال میں ہلاک ہو گئے۔

پولیس کے مطابق ہلاک کانسٹبل سعید خان ڈی ایس پی لکی کے ساتھ گنر کی ڈیوٹی انجام دے رہے تھے۔ وہ گزشتہ روز نجی سیمنٹ فیکٹری پر بس دھماکے کے بعد دہشت گردوں کے خلاف جاری کارروائی کے دوران زخمی ہوئے تھے اور انہیں فوری طور پر خلیفہ گلنواز ہسپتال بنوں منتقل کیا گیا تھا۔ بدقسمتی سے طبی امداد کے باوجود وہ زخموں کی تاب نہ لا سکے۔

آپریشن کے دوران دو دہشت گرد بھی ہلاک ہوئے تھے، جن کے خلاف پولیس نےلکی سیمنٹ فیکٹری دھماکے کے بعد کارروائی کی تھی۔

اس دھماکے میں ایک شخص ہلاک اور 13 افراد زخمی ہوگئے تھے جن میں تین کی حالت تشویشناک بتائی جاتی ہیں۔