متحدہ عرب امارات کی افواج یمن سے انخلا کا عمل شروع

ابوظہبی (ڈیلی اردو/نیوز ایجنسیاں) یمنی میڈیا کے مطابق متحدہ عرب امارات کی افواج نے یمن سے انخلا شروع کر دیا ہے۔

المشہد ویب سائٹ نے رات کو اطلاع دی کہ اماراتی فورسز نے ’بڑے پیمانے پر‘ انخلا کے ایک حصے کے طور پر مشرقی شبوہ صوبے میں فوجی اڈوں کو خالی کرنا شروع کر دیا ہے۔

یاد رہے کہ سعودی عرب کی سربراہی میں قائم اتحاد کی جانب سے یمن میں کیے گئے ایک فضائی حملے میں متحدہ عرب امارات سے آنے والے مبینہ ہتھیاروں اور فوجی گاڑیوں کو نشانہ بنانے کے بعد سعودی عرب نے مطالبہ کیا تھا کہ یو اے ای یمن کی درخواست پر عمل کرتے ہوئے 24 گھنٹے میں یمن سے اماراتی فوجیوں کو واپس بُلائے۔

متحدہ عرب امارات کی وزارت دفاع نے گذشتہ روز ہی یمن میں موجود اپنی افواج کے مشنز کو ختم کرنے کا اعلان کیا تھا۔

اماراتی وزارت دفاع کی جانب سے یہ فیصلہ آنے سے قبل سعودی عرب نے یو اے ای پر یمن کے معاملے پر الزامات عائد کیے تھے تاہم امارات نے ان الزامات کی پُرزور تردید کی تھی۔

حالیہ پیشرفت کے بعد آج صبح سعودی عرب اور متحدہ عرب امارات کے ذرائع ابلاغ میں یمن میں ہونے والے واقعات پر متضاد بیانیے کا سہارا لیا، جس سے دونوں ملکوں کے درمیان بڑھتی دشمنی کی عکاسی ہوتی ہے۔

سعودی اخبار الشرق الاوسط نے آج ہیڈ لائن لگائی کہ ’سعودی عرب نے اپنی سلامتی اور یمن کے استحکام کے لیے سرخ لکیر کھینچ دی۔‘

سعودی میڈیا نے کل کابینہ کے اجلاس میں شاہ سلیمان کے بیانات کو بھی نمایاں کر کے پیش کیا، جس میں انھوں نے کہا تھا کہ مملکت ’قومی سلامتی کو خطرے میں ڈالنے والی کسی بھی چیز کا مقابلہ کرنے کے لیے تیار ہے۔‘

دوسری جانب سکائی نیوز عربیہ نے بتایا کہ اماراتی حکومت یمن کے حوالے سے سعودی بیان میں ’جھوٹے الزامات کو مسترد کرتی ہے۔‘

اس کے علاوہ العین ویب سائٹ نے اماراتی کوششوں کے بارے میں بھی رپورٹ کیا جن کا مقصد یمنی عوام کو ’سپورٹ‘ کرنا اور ملک میں ’دہشت گرد اور انتہا پسند‘ گروہوں کا مقابلہ کرنا ہے۔