معاہدہ ابراہیمی پر پاکستان کے مؤقف میں کوئی لچک نہیں، وزیرِ خارجہ اسحاق ڈار

واشنگٹن (ڈیلی اردو) امریکہ کے دارالحکومت واشنگٹن میں امریکی سیکریٹری خارجہ مارکو روبیو سے ملاقات کے بعد ایک نیوز کانفرنس میں پاکستان کے نائب وزیرِ اعظم اور وزیرِ خارجہ اسحاق ڈار نے معاہدہ ابراہیمی اور اسلام آباد کی پالیسی پر بھی تبصرہ کیا ہے۔

ان کا کہنا تھا کہ ’افواہیں گردش کر رہی ہیں کہ پاکستان کو کہا گیا ہے کہ وہ معاہدہ ابراہیمی کا حصہ بنے۔ پاکستان کی اس حوالے سے ہمیشہ بہت واضح پالیسی رہی ہے کہ جب تک فلسطین کو تسلیم نہیں کیا جاتا، وہ سنہ 1967 سے پہلے والے ماڈل پر واپس نہیں جاتا اور قدس الشریف (یروشلم) اس کا دارالحکومت نہیں بن جاتا، تب تک اس معاملے پر کوئی لچک نہیں آ سکتی۔‘

خیال رہے چند دن قبل صدر ٹرمپ نے کہا تھا کہ انھوں نے پاکستان، سعودی عرب اور قطر سمیت متعدد ممالک سے معاہدہ ابراہیمی میں شامل ہونے کی درخواست کی ہے۔