مغربی کنارے میں اسرائیلی فورسز کی فائرنگ سے مزید 2 فلسطینی ہلاک

غزہ (ڈیلی اردو)مغربی کنارے میں دو الگ الگ واقعات میں اسرائیلی فوج نے فائرنگ کرکے دو فلسطینی نوجوانوں کو ہلاک کردیا۔

عالمی خبر رساں ادارے کے مطابق اسرائیلی فوج نے دعویٰ کیا ہے کہ مغربی کنارے میں چاقو سے لیس ایک نوجوان نے حملہ کیا جس پر فوجی اہلکاروں نے اپنے دفاع میں نوجوان پر گولی چلائی۔

دوسری جانب عینی شاہد کا کہنا ہے کہ نوجوان کو چوکی پر روکا گیا تھا اور تلاشی کے دوران ہونے والی تلخ کلامی پر اسرائیلی فوج نے گولیاں مار کر ہلاک کیا۔

دوسری جانب مغربی کنارے کے ایک اور علاقے میں اسرائیلی فوج نے فلسطینی نوجوان کو اپنی بربریت کا نشانہ بنایا، نوجوان کو پستول رکھنے کا الزام عائد کرکے ہلاک کیا گیا۔

یاد رہے کہ اسرائیلی فوج نے رواں سال کے پہلے مہینے میں 35 فلسطینی نوجوانوں کو ہلاک کیا جس میں ایک ہی واقعے میں 10 نوجوانوں کو ہلاک کیا گیا تھا جس کے بعد سے مغربی کنارے میں کشیدگی برقرار ہے۔