مقبوضہ کشمیر میں ڈیڑھ کروڑ لوگوں کی زندگیاں خطرے میں ہیں: ترجمان دفتر خارجہ

اسلام آباد (ڈیلی اردو) ترجمان دفتر خارجہ ڈاکٹر محمد فیصل کا کہنا ہے کہ مقبوضہ کشمیر میں بد ترین انسانی المیہ پیدا ہو گیا ہے، ڈیڑھ کروڑ لوگوں کی زندگیاں خطرے میں ہیں،سولہ دن سے لوگوں کو گھروں میں محصور کر دیا گیا۔

سینیٹ کی قائمہ کمیٹی برائے امور کشمیر و گلگت بلتستان کا اجلاس سینیٹر ساجد میر کی زیر صدارت ہوا۔

ترجمان دفتر خارجہ ڈاکٹر فیصل نے مقبوضہ کشمیر کی صورتحال پر بریفنگ دیتے ہوئے آگاہ کیا کہ مقبوضہ کشمیر میں بدترین انسانی المیہ پیدا ہوگیا ہے۔ کشمیر میں ڈیڑھ کروڑ لوگوں کی زندگیاں خطرے میں ہیں۔ سولہ دن سے لوگوں کو گھروں میں محصور کر دیا گیا، ہر گھر کے سامنے ایک فوجی کھڑا ہے۔ بھارتی فوج نے چار ہزار سے زائد لوگوں کو جیلوں میں منتقل کر دیا ہے۔

ڈاکٹر فیصل نے کہا کہ بھارت کی جانب سے آرٹیکل 370 کو ختم کرنا ہمارے لئے حیران کن نہیں تھا۔ بھارت معاملے کو دہشت گردی سے جوڑنے کی کوشش کر رہا ہے اس کے لیے پلوامہ 2 کرنا چاہ رہاہے، لائن آف کنٹرول پر حالات بہت کشیدہ ہیں، روزانہ فائرنگ کی جارہی ہے ہمارے کچھ جوان شہید ہوئے، پاک فوج نے بھی بھرپور جواب دیا ہے کئی بھارتی فوجی ہلاک ہوئے۔

ترجمان دفتر خارجہ نے کہا کہ مقبوضہ کشمیر کی صورتحال پر نظر رکھے ہوئے ہیں، نیشنل سیکیورٹی کمیٹی کی روشنی میں بھارت سے سفارتی تعلقات محدود کیے۔ انسانی حقوق کونسل اور او آئی سی وزرائے خارجہ میں معاملہ اٹھایا جائے گا۔