مہمند، لکی مروت، بنوں، خیبر اور شمالی وزیرستان میں دہشت گردانہ واقعات، متعدد ہلاکتیں

واشنگٹن (نمائندگان ڈیلی اردو) پاکستان کے شورش زدہ صوبے خیبرپختونخوا کے مختلف اضلاع میں سیکیورٹی سے متعلق متعدد واقعات رپورٹ ہوئے ہیں، جن میں سیکیورٹی فورسز کی کارروائیاں، عسکریت پسندوں کے حملے اور جھڑپیں شامل ہیں۔

مہمند

سوران درہ میں سیکیورٹی فورسز نے خفیہ اطلاعات کی بنیاد پر آپریشن کیا۔ آپریشن کے دوران دہشتگردوں اور سیکیورٹی فورسز کے درمیان شدید فائرنگ کا تبادلہ ہوا۔ فورسز کی مؤثر کارروائی کے نتیجے میں کالعدم تنظیم ٹی ٹی پی سے تعلق رکھنے والے دو دہشتگرد، ابو بکر اور حسین، ہلاک ہو گئے۔ سیکیورٹی ذرائع کے مطابق ہلاک دہشتگرد علاقے میں دہشتگردانہ سرگرمیوں میں ملوث تھے۔

لکی مروت

پہاڑخیل پکہ میں عسکریت پسندوں نے ضلع لکی مروت پولیس میں تعینات ٹریفک انچارج انور شاہ کے گھر کو نشانہ بنایا۔ پولیس ذرائع کے مطابق ملزمان نے گھر کو آگ لگا دی جبکہ بیٹھک کی دیوار اور مرکزی گیٹ بھی گرا دیا۔ واقعے کے وقت گھر خالی تھا۔ دھماکے اور آتشزدگی کے نتیجے میں گھر کے کئی کمرے اور دیواریں منہدم ہو گئیں۔

بنوں

بکا خیل میں سیکیورٹی فورسز نے انٹیلی جنس معلومات کی بنیاد پر کارروائی کرتے ہوئے کالعدم تنظیم کے کمانڈر سیف اللہ کے مرکز کو نشانہ بنا کر تباہ کر دیا۔ ذرائع کے مطابق اس کارروائی کے نتیجے میں درجنوں دہشتگرد ہلاک ہو گئے۔

خیبر 

تحصیل باڑہ کے علاقے آکاخیل عالم کلے (قبروں کلے) میں نامعلوم مسلح افراد نے ایک مسجد سمیت عام شہریوں کے گھروں کو آگ لگا دی۔ واقعے کے بعد علاقے کے عوام نے پولیس اور سیکیورٹی فورسز سے مطالبہ کیا ہے کہ ملوث شرپسندوں کے خلاف فوری اور مؤثر کارروائی کی جائے۔

شمالی وزیرستان

میرعلی میں ٹی ایچ کیو اسپتال کے قریب سیکیورٹی فورسز اور دہشتگردوں کے درمیان فائرنگ کا تبادلہ ہوا۔ مقامی ذرائع کے مطابق سیکیورٹی فورسز کی مؤثر کارروائی کے باعث دہشتگرد فرار ہو گئے، تاہم کسی جانی نقصان کی اطلاع نہیں ملی۔

سیکیورٹی اداروں کا کہنا ہے کہ امن و امان کی صورتحال برقرار رکھنے کے لیے انٹیلی جنس بنیادوں پر کارروائیاں جاری ہیں۔