نیتن یاہو کا غزہ سے متعلق ٹرمپ کے 15 نکاتی امن منصوبے پر تحفظات

تل ابیب(ڈیلی اردو) اسرائیلی وزیراعظم نیتن یاہو نے امریکی صدر ڈونلڈ ٹرمپ کے تجویز کردہ غزہ امن منصوبے کے بعض نکات کو قبول کرنے سے انکار کرتے ہوئے واضح کیا ہے کہ اسرائیلی فوج حماس کی عسکری صلاحیت مکمل طور پر ختم ہونے تک غزہ سے انخلا نہیں کرے گی۔

اسرائیلی میڈیا رپورٹس کے مطابق نیتن یاہو نے ٹرمپ کے غزہ پیس بورڈ کی جانب سے پیش کیے گئے 15 نکاتی منصوبے پر تحفظات کا اظہار کیا۔ ان کا کہنا ہے کہ اسرائیل حماس کی عارضی یا ظاہری کمزوری کو کافی نہیں سمجھتا بلکہ اس کی حقیقی عسکری طاقت کے مکمل خاتمے کا خواہاں ہے۔

نیتن یاہو کے مطابق اس معاملے پر امریکا کے ساتھ مذاکرات جاری ہیں۔ ان کا کہنا تھا کہ امریکی حکام کی بعض تجاویز قابل قبول ہیں، تاہم کچھ نکات ایسے بھی ہیں جنہیں اسرائیل تسلیم نہیں کرسکتا۔

واضح رہے کہ امریکی صدر ڈونلڈ ٹرمپ نے غزہ کے لیے 15 نکاتی امن منصوبہ پیش کیا تھا۔ ٹرمپ کا مؤقف ہے کہ اس منصوبے کے ذریعے خطے کو جنگ کی صورتحال سے نکال کر امن اور معاشی ترقی کی طرف لے جایا جاسکتا ہے۔