نیوزی لینڈ میں چینی ریستورانوں پر حملے، 4 افراد زخمی

آکلینڈ (ڈیلی اردو/رائٹرز)نیوزی لینڈ میں 3 ریستورانوں پر کلہاڑی بردار شخص کے حملوں سے 4 افراد زخمی ہوگئے۔

غیر ملکی خبر رساں ادارے کے مطابق شمالی آکلینڈ کے مضافاتی علاقے البانے میں رات گئے کلہاڑی بردار شخص نے ایشیائی ریستورانوں پر حملہ کیا۔

WARNING: GRAPHIC CONTENT – An axe attack at three Chinese restaurants in Auckland, New Zealand, injured four people, authorities and local media reported https://t.co/YQQGvaYBpQ pic.twitter.com/3ZARGiaUfv

— Reuters (@Reuters) June 20, 2023

پولیس کا کہنا ہے کہ تینوں چینی ریستوران تھے اور قریب ہی واقع تھے، واقعے کے بعد ایک 24 سالہ مشتبہ شخص کو گرفتار کرلیا گیا ہے، جس پر حملہ کرنے کا الزام ہے۔ پولیس کی جانب سے ابھی تک حملے کے پیچھے مقاصد کا نہیں بتایا گیا۔

ہسپتال انتظامیہ کے مطابق ایک شدید اور تین معمولی زخمیوں کو اسپتال پہنچایا گیا ہے تاہم تمام افراد کی حالت خطرے سے باہر ہے۔

ایک چینی ریستوران میں کام کرنیوالے ملازم نے مقامی اخبار کو بتایا کہ اچانک ایک شخص اندر آیا اور کلہاڑی سے حملہ کردیا، اس نے مجھ پر بھی حملہ کیا مگر میں نے کلہاڑی پکڑلی، اس کے باوجود وہ میرے سر کو نشانہ بنانے کی کوشش کرتا رہا۔

عملے کا کہنا ہے کہ اس کے فوراً بعد حملہ آور دوسرے ریستوران میں گھس گیا اور وہاں لوگوں کو زخمی کردیا۔

پولیس کے اعلیٰ عہدیدار ٹیموتھی ولیمز کا کہنا ہے کہ ایسے کوئی شواہد نہیں ملے کہ حملہ آور کا کوئی اور ساتھی اس میں شامل ہو بلکہ یہ اس کا انفرادی فعل تھا۔

انہوں نے مزید کہا کہ گرفتار حملہ آور پر مزید الزامات عائد کئے جانے کی بھی توقع ہے۔