ٹانک میں ریسکیو 1122 کے تین اہلکار اغوا، سرچ آپریشن جاری

ٹانک (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع ٹانک میں ڈیرہ اسماعیل خان روڈ پر گاؤں صفدر کے قریب دہشت گردوں نے ریسکیو 1122 کے تین اہلکاروں کو اغوا کر لیا۔

پولیس ذرائع کے مطابق واقعہ تھانہ ایس ایم اے کی حدود میں پیش آیا، جہاں نامعلوم افراد نے ناکہ لگا کر ریسکیو اہلکاروں کی گاڑی کو روکا اور انہیں اپنے ساتھ لے گئے۔

مغوی اہلکاروں میں سینئر انچارج وقاص عالم، کلرک مدثر اور ڈرائیور افتخار شامل ہیں۔ ذرائع کے مطابق اغوا کار اہلکاروں کو ان کی نجی کلٹس گاڑی سمیت نامعلوم مقام کی طرف لے گئے۔

واقعے کی اطلاع ملتے ہی پولیس کی بھاری نفری موقع پر پہنچ گئی اور علاقے کو گھیرے میں لے لیا گیا۔ بعد ازاں سیکیورٹی فورسز نے ناکہ بندی کرتے ہوئے مغویوں کی بازیابی کے لیے سرچ آپریشن شروع کر دیا۔

ڈپٹی کمشنر تنویر احمد نے واقعے کی تصدیق کرتے ہوئے کہا ہے کہ صورتحال پر نظر رکھی جا رہی ہے اور تمام دستیاب وسائل بروئے کار لائے جا رہے ہیں۔