ٹانک : تھانہ سٹی پر حملہ، جنڈولہ میں فائرنگ سے 2 افراد ہلاک

ٹانک (ڈیلی اردو) خیبرپختونخواہ کے شورش زدہ ضلع ٹانک میں نامعلوم مسلح افراد نے ٹانک سٹی تھانے کو دستی بم حملے کا نشانہ بنایا، تاہم واقعے میں کسی جانی یا مالی نقصان کی اطلاع نہیں ملی۔

پولیس ذرائع کے مطابق نامعلوم افراد نے تھانہ سٹی پر دستی بم پھینکا اور دھماکے کے بعد فرار ہوگئے۔ حملے کے وقت موجود تمام پولیس اہلکار محفوظ رہے۔

واقعے کے بعد پولیس اور سیکیورٹی فورسز نے علاقے کو گھیرے میں لے لیا اور تھانے کے اطراف سمیت ملحقہ علاقوں میں سرچ آپریشن شروع کردیا۔ پولیس نے حملہ آوروں کی گرفتاری اور واقعے کے محرکات کا تعین کرنے کے لیے تحقیقات کا آغاز کردیا ہے۔

جنڈولہ میں مسلح افراد کی فائرنگ، دو افراد ہلاک

ٹانک کے سب ڈویژن جنڈولہ میں نامعلوم مسلح افراد کی فائرنگ سے دو افراد ہلاک ہوگئے، جن میں سابق امن کمیٹی کے سربراہ نصراللہ نعمت خیل کا بھائی بھی شامل ہے۔

پولیس کے مطابق مسلح افراد نے سنگری اور عزیز الرحمن کو فائرنگ کا نشانہ بنایا، جس کے نتیجے میں دونوں موقع پر ہی ہلاک ہوگئے۔ اطلاع ملنے پر ریسکیو اہلکار جائے وقوعہ پر پہنچے اور لاشوں کو مقامی اسپتال منتقل کردیا۔

پولیس نے واقعے کی تحقیقات شروع کرتے ہوئے ملزمان کی تلاش کا سلسلہ جاری رکھا ہوا ہے، جبکہ فائرنگ کی وجوہات بھی معلوم کی جارہی ہیں۔