ٹرمپ کا دوٹوک اعلان: پاکستان “اچھا کام کر رہا ہے” افغان محاذ پر کھلی حمایت

واشنگٹن (نمائمدہ ڈیلی اردو) امریکی صدر ڈونلڈ ٹرمپ نے افغانستان میں پاکستانی کارروائیوں کی حمایت کا اظہار کرتے ہوئے کہا ہے کہ پاکستان “اچھا کام کر رہا ہے”۔

وائٹ ہاؤس کے باہر صحافیوں سے گفتگو کرتے ہوئے ٹرمپ کا کہنا تھا کہ پاکستان اور افغانستان کے درمیان جاری لڑائی میں امریکہ مداخلت کر سکتا ہے، تاہم انہوں نے پاکستان کے ساتھ اپنے تعلقات کو مثبت قرار دیا۔

ایک صحافی نے سوال کیا کہ کیا پاکستان نے افغانستان کے خلاف کارروائی سے قبل امریکہ سے مداخلت کی درخواست کی تھی؟ اس پر ٹرمپ نے جواب دیا کہ وہ اس صورتحال میں مداخلت کر سکتے ہیں۔

انہوں نے کہا:“آپ کو معلوم ہوگا کہ میری پاکستان سے اچھی دوستی ہے۔ ان کا وزیر اعظم عظیم ہے، وہاں عظیم جنرل ہے، عظیم رہنما ہے۔”

ٹرمپ کا مزید کہنا تھا کہ وہ ان شخصیات کی بہت عزت کرتے ہیں اور پاکستان اچھا کام کر رہا ہے۔

اس سے قبل امریکی محکمۂ خارجہ میں سیاسی امور کی سیکریٹری ایلیسن ہوکر نے کہا تھا کہ امریکہ طالبان کے حملوں کے خلاف پاکستان کے حقِ دفاع کی حمایت کرتا ہے۔

سماجی رابطے کی ویب سائٹ ایکس پر اپنے پیغام میں انہوں نے بتایا کہ جمعے کی شب ان کی پاکستانی سیکریٹری خارجہ آمنہ بلوچ سے گفتگو ہوئی، جس دوران پاکستان اور افغان طالبان کے درمیان حالیہ جھڑپوں میں جانوں کے ضیاع پر ہمدردی کا اظہار کیا گیا۔

انہوں نے کہا “ہم صورتحال کی قریب سے نگرانی کر رہے ہیں اور طالبان کے حملوں کے خلاف پاکستان کے حقِ دفاع کی حمایت کرتے ہیں۔”

امریکی قیادت کے یہ بیانات ایسے وقت سامنے آئے ہیں جب پاک–افغان سرحد پر کشیدگی میں اضافہ ہو رہا ہے اور دونوں جانب سے فوجی کارروائیوں اور ہلاکتوں کے دعوے کیے جا رہے ہیں۔