ٹی ایل پی کے مظاہروں میں ہولناک خونریزی: 11 پولیس اور 16 شہری ہلاک، 1702 زخمی

لاہور (ڈیلی اردو ) پنجاب پولیس نے 2016 تا 2025 کے دوران انتہا پسند تنظیم تحریک لبیک پاکستان (ٹی ایل پی) کے پرتشدد مظاہروں اور احتجاجات کے دوران ہونے والے جانی و مالی نقصانات کی تفصیلات جاری کر دی ہیں۔

پولیس کے ریکارڈ کے مطابق، انتہا پسند تنظیم تحریک لبیک پاکستان (ٹی ایل پی) کے مظاہرین کے مظاہروں کے دوران پنجاب بھر میں 11 پولیس ملازمین ہلاک اور 1648 زخمی ہوئے۔ ان میں سے 69 ملازمین مستقل معذور جبکہ 202 شدید زخمی ہوئے ہیں۔

پولیس نے بتایا کہ مظاہرین کے تشدد سے 16 عام شہری ہلاک اور 54 شدید زخمی ہوئے، جس سے احتجاجات کے دوران انسانی جانوں کو شدید نقصان پہنچا۔

مالی نقصان کے حوالے سے پولیس ریکارڈ میں درج ہے کہ انتہا پسند تنظیم تحریک لبیک پاکستان (ٹی ایل پی) کے مظاہرین نے 97 گاڑیاں مکمل طور پر تباہ کیں جبکہ 2 گاڑیاں آگ لگانے کے نتیجے میں جل گئیں۔ اس کے علاوہ احتجاج کے دوران پولیس کی 10 عمارتوں کو شدید نقصان پہنچا۔

پولیس نے بتایا کہ انتہا پسند تنظیم تحریک لبیک پاکستان (ٹی ایل پی) کے پرتشدد مظاہرین کے خلاف 305 مقدمات دہشت گردی کی دفعات کے تحت اور 480 مقدمات دیگر دفعات کے تحت درج کیے گئے۔ موجودہ مقدمات میں 1529 افراد کو نامزد جبکہ 17,812 نامعلوم ملزمان کے خلاف کارروائی کی جا رہی ہے۔

پنجاب پولیس کا کہنا ہے کہ یہ اعداد و شمار صوبے میں امن و امان کی صورتحال اور تشدد کے اثرات کی واضح تصویر پیش کرتے ہیں۔ 

پولیس حکام نے عوام سے اپیل کی ہے کہ وہ قانون کی بالادستی کو یقینی بنانے میں تعاون کریں تاکہ کسی بھی قسم کی پرتشدد کارروائی کو روکا جا سکے۔