پانامہ کیس: حکومت نے جے آئی ٹی کے سربراہ واجد ضیا کو ڈی جی ایف آئی اے تعینات کردیا

اسلام آباد (ڈیلی اردو) پانامہ کیس کی تحقیقات کی لئے بنائی جانیوالی جے آئی ٹی کے سربراہ واجد ضیا کو ڈی جی ایف آئی اے تعینات کردیا گیا ہے۔

میڈیا رپورٹ کے مطابق گریڈ 21 کے افسر واجد ضیا کو ڈی جی ایف آئی اے تعینات کر دیا گیا ہے۔ واجد ضیا اس سے قبل آئی جی ریلوے کے عہدے پر فرائض سرانجام دے رہے تھے۔

واجد ضیا کی جگہ پولیس سروس کے مشتاق مہر کو گریڈ 22 میں ترقی دیکر آئی جی ریلوے تعینات کیا گیا ہے۔

واجد ضیا کے علاوہ حکومت نے بیوروکریسی میں دیگر تقرریاں اور تبادلے بھی کیے اور پاکستان ایڈمنسٹریٹو سروس کے گریڈ 22 کے افسر یوسف نسیم کھوکھر کا تبادلہ کرکے انہیں سیکریٹری داخلہ ڈویژن تعینات کردیا گیا ہے۔ حکومت نے ایف آئی اے کے تمام زونل ڈائریکٹرز بھی تبدیل کر دیے ہیں۔

خیال رہے کہ گزشتہ دنوں وفاقی وزارت داخلہ نےایف آئی اے کے ڈائریکٹر جنرل بشیر میمن کو جبری رخصت پر بھیج دیا تھا اور ان کی جگہ ڈاکٹر مجیب الرحمان خان کو قائم مقام ڈی جی کا چارج دیا گیا تھا۔

واضح رہے کہ واجد ضیا ن لیگ کے دور حکومت میں پانامہ کیس کی تحقیقات کیلئے بنائی جانیوالی جے آئی ٹی کے سربراہ بھی رہے چکے ہیں۔