پاکستانی فضائی حملے میں 3 افغان کرکٹرز سمیت 7 افراد ہلاک، 7 زخمی

واشنگٹن (ش ح ط) افغانستان نے پاکستان پر الزام لگایا ہے کہ جمعے کی شب صوبہ پکتیکا میں فضائی حملے کے دوران تین افغان کرکٹرز ہلاک ہوئے، جس کے بعد افغان کرکٹ بورڈ نے نومبر میں پاکستان میں شیڈول سہ فریقی ٹی ٹوئنٹی سیریز سے اپنی ٹیم کی دستبرداری کا اعلان کیا ہے۔

افغان کرکٹ بورڈ کے مطابق ہلاک ہونے والے کھلاڑیوں میں کبیر آغا ارغون، صبغت اللہ زروک اور ہارون شامل ہیں، جبکہ حملے میں دیگر دو افراد بھی ہلاک اور سات زخمی ہوئے۔ بورڈ نے کہا کہ کھلاڑی ایک دوستانہ میچ میں شرکت کے بعد اپنے گھروں واپس لوٹ رہے تھے کہ انہیں ایک اجتماع کے دوران نشانہ بنایا گیا۔

افغان کرکٹ ٹیم کے کپتان راشد خان اور سابق کپتان محمد نبی سمیت دیگر کھلاڑیوں نے اس حملے کی مذمت کی ہے۔ بورڈ نے ہلاک شدگان کے احترام میں سہ فریقی سیریز سے دستبرداری کا فیصلہ کیا ہے۔ یہ سیریز 17 تا 29 نومبر پاکستان میں، میزبان پاکستان اور سری لنکا کے درمیان کھیلنی تھی۔

افغان طالبان کے ترجمان ذبیح اللہ مجاہد نے بھی اس حملے کی مذمت کرتے ہوئے کہا کہ پاکستان کی فضائی کارروائی نے افغان خود مختاری کی خلاف ورزی کی۔

پاکستان کی حکومت یا فوج کی جانب سے اس واقعے پر ابھی تک کوئی باضابطہ بیان جاری نہیں ہوا، تاہم پاکستانی سیکیورٹی ذرائع کا کہنا ہے کہ حملے میں جنوبی اور شمالی وزیرستان سے ملحقہ افغان علاقوں میں حافظ گل بہادر گروپ کے ٹھکانوں کو نشانہ بنایا گیا۔