پاکستان اور امریکہ کے درمیان انسداد دہشت گردی مذاکرات، ٹی ٹی پی، داعش اور بی ایل اے کے خلاف تعاون بڑھانے پر اتفاق

واشنگٹن (ش ح ط) پاکستان اور امریکہ نے انسدادِ دہشت گردی کے شعبے میں تعاون مزید مضبوط بنانے، موجودہ سکیورٹی خطرات سے مشترکہ طور پر نمٹنے اور خطے میں امن و استحکام کے لیے باہمی شراکت داری کو مزید وسعت دینے کے عزم کا اعادہ کیا ہے۔

پاکستانی دفتر خارجہ کے مطابق 4 اگست 2026 کو واشنگٹن میں پاکستان اور امریکہ کے درمیان انسداد دہشت گردی مکالمے (Counterterrorism Dialogue) کا چوتھا دور منعقد ہوا۔

اجلاس میں امریکی وفد کی قیادت امریکی محکمہ خارجہ کے کوآرڈینیٹر برائے انسداد دہشت گردی سفیر گریگوری لوگیرفو نے کی، جبکہ پاکستانی وفد کی سربراہی وزارت خارجہ کے اسپیشل سیکریٹری سفیر نبیل منیر نے کی۔

دفتر خارجہ کی جانب سے سوشل میڈیا پلیٹ فارم ایکس پر جاری بیان کے مطابق دونوں ممالک نے موجودہ سکیورٹی خطرات، انسداد دہشت گردی میں باہمی تعاون بڑھانے، سرحدی سلامتی کو مضبوط بنانے، دہشت گردوں کی نقل و حرکت اور معاون نیٹ ورکس کو ختم کرنے کے اقدامات پر تفصیلی تبادلہ خیال کیا۔

مشترکہ اعلامیے میں دونوں ممالک نے اس عزم کا اعادہ کیا کہ وہ اپنے شہریوں اور خطے کے امن و استحکام کے لیے خطرہ بننے والی دہشت گرد تنظیموں کے خلاف تعاون جاری رکھیں گے۔ 

اعلامیے میں داعش خراسان (داعش-خراسان)، القاعدہ، کالعدم تحریک طالبان پاکستان (ٹی ٹی پی)، کالعدم بلوچ لبریشن آرمی (بی ایل اے) اور اس سے وابستہ گروہوں کا خصوصی طور پر ذکر کیا گیا۔

اعلامیے کے مطابق دونوں حکومتوں نے انسداد دہشت گردی کے شعبے میں انٹیلی جنس تعاون، معلومات کے تبادلے اور مشترکہ کوششوں کو مزید مؤثر بنانے پر بھی اتفاق کیا تاکہ دونوں ممالک کی سلامتی کو یقینی بنایا جا سکے۔

پاکستان اور امریکہ نے اس بات کا بھی اعادہ کیا کہ انسداد دہشت گردی میں جاری تعاون خطے میں دیرپا امن، استحکام اور خوشحالی کے مشترکہ وژن کا اہم حصہ ہے۔