پاکستان: بہاولنگر سے بھارتی خفیہ ایجنسی’’را‘‘ سے تعلق رکھنے والے دو دہشت گرد گرفتار

لاہور (ڈیلی اردو ) ‏کاؤنٹر ٹیررازم ڈیپارٹمنٹ (سی ٹی ڈی) نے بہاولنگر میں بروقت کارروائی کرکے بڑی دہشتگردی کی کوشش ناکام بنادی۔

ترجمان سی ٹی ڈٰی کے مطابق بہاولنگر سے دو دہشت گردوں کو گرفتار کرلیا گیا ہے، دہشتگرد کالعدم تنظیم سے تعلق رکھتے ہیں، ملزمان بھارتی خفیہ ایجنسی ’’را‘‘ سے رابطے میں تھے۔

ترجمان کا کہنا ہے کہ دہشتگردوں کے قبضے سے اسلحہ، بارودی مواد اور جدید موبائل برآمد کرلیا گیا، ملزمان بڑا دھماکا کرنے کی منصوبہ بندی کررہے تھے۔

سی ٹی ڈی حکام نے بتایا کہ حساس تنصیبات، سرکاری عمارات کو نشانہ بنانے کا منصوبہ ناکام بنایا گیا تھا، گرفتار دہشت گردوں کی شناخت رجب  اور ہاشم  کے ناموں سے ہوئی ہے۔

ترجمان نے مزید بتایا گرفتار دہشت گرد 289 ایچ آر فورٹ عباس کے رہائشی ہیں، سی ٹی ڈی نے کارروائی کے بعد دہشتگردی کی دفعات کے تحت مقدمہ درج کیا، ملزمان کے خلاف ایکسپلوسو ایکٹ اور 7 اے ٹی اے کے تحت مقدمہ درج کیا گیا ہے۔