پاکستان میں 80 کالعدم تنظیموں عملی طور پر موجود ہیں، ایف آئی اے

اسلام آباد (ڈیلی اردو) ایف آئی اے، پاسپورٹ اینڈ ایمگریشن اور نیکٹا حکام نے بتایا کہ ملک میں اس وقت 80 کالعدم تنظیموں عملی طور پر موجود ہیں، ایف آئی اے نے ایک سال میں توہین مذہب کے 70 اور ہراسمنٹ کے 518 کیسز رجسٹر کیے، ملک میں پاسپورٹ کا بیک لاگ ایک لاکھ 65 ہزارہے۔

سینیٹر فیصل سلیم کی زیرصدارت قائمہ کمیٹی برائے داخلہ کا اجلاس ہوا۔ جس میں ایف آئی اے، پاسپورٹ اینڈ ایمگریشن اور نیکٹا حکام نے بریفنگ دی۔ ڈی جی ایف آئی اے احمد اسحاق نے بریفنگ میں بتایا کہ بجلی چوری پر 819 ملین کا نقصان روکا اور 560 ملین ریکورکیے۔

سینیٹر عبدالقادر نے کہا کہ حکومت 580 ارب کی بجلی چوری کا بتارہی جبکہ ایف آئی اے ملینزمیں ریکوری کا کہ رہے، ڈی جی پاسپورٹ اینڈ ایمیگریشن مصطفی جمال قاضی نے بریفنگ میں بتایاکہ ایک سال میں ادارے نے 45 ارب روپے کا ریونیو اکٹھا کیا۔

انہوں نے بتایا کہ آئندہ ہدف 90 ارب دیا گیا ہے جبکہ پاسپورٹ کا بیک لاگ ایک لاکھ 65 ہزارہے پاسپورٹ ایشو ہونے سے متعلق اوورسیز کا کوئی بیک لاگ نہیں ہے۔

کوآرڈینیٹر نیکٹا رائے طاہر نے بتایا کہ پاکستان میں 80 کالعدم جماعتیں ہیں، کالعدم تنظیموں کے لیڈروں کی تفصیلات بھی موجود ہیں۔ اس موقع پر سنیٹر شہادت اعوان اور سینیٹر عرفان صدیقی نے بغیر وارنٹ شہری کی گرفتاری پر تشویش کا اظہار کیا۔