پاکستان کشمیریوں کی حمایت جاری رکھے گا: ترجمان دفتر خارجہ

اسلام آباد (ڈیلی اردو) پاکستان کشمیریوں کی سفارتی حمایت جاری رکھے گا۔ ترجمان دفتر خارجہ عائشہ فاروقی کی ہفتہ وار بریفنگ۔ مسئلہ کشمیر سلامتی کونسل اور عالمی عدالت انصاف سمیت ہرفورم پر اٹھاتے رہیں گے۔ کررونا وائرس پرچین سے رابطے میں ہیں۔ چین میں پاکستانیوں کا خیال رکھاجارہا ہے۔

ہفتہ وار بریفنگ میں ترجمان دفتر خارجہ عائشہ فاروقی کا کہنا تھا کہ پاکستانی قوم نے 186 روز سے لاک ڈاؤن کے شکار کشمیری عوام کے ساتھ یکجہتی کا اظہار کیا۔ کشمیری عوام لاک ڈاؤن کے باعث اپنے بنیادی حقوق سے محروم ہیں۔ بھارتی حکومت نے مقبوضہ کشمیر کو دنیا کی سب سے بڑی جیل میں تبدیل کر رکھا ہے۔ کشمیریوں کو حق خودارادیت ملنا چاہیئے۔

چینی شہر ووہان میں متروک امریکی قونصلیٹ کی عمارت سے انسانی حیات کیلئے نقصان دہ کنٹینرز ملنے کے معاملہ پر ترجمان دفتر خارجہ نے لاعلمی کا اظہار کرتے ہوئے بتایا کہ ابھی تک چین کی جانب سے سرکاری طور پر ایسا کوئی بیان نہیں دیکھا۔ وائرس سے متاثرہ چینی شہر ووہان ابھی تک بند ہے تاہم چینی حکومت پاکستانی طالبعلموں سمیت تمام شہریوں کو بہترین علاج اور سہولیات فراہم کر رہی ہے۔

ترجمان دفتر خارجہ عائشہ فاروقی کے مطابق پاکستان مسئلہ کشمیرسلامتی کونسل اور عالمی عدالت انصاف سمیت ہر فورم پر اٹھاتا رہے گا۔ پاکستان امریکہ اور طالبان کے درمیان امن عمل کو قریب سے دیکھ رہا ہے۔ ہم افغان دھڑوں کے مابین مذاکرات کے خواہاں ہیں۔ پاکستان اور ترکی کے درمیان دہری شہریت کے معاملے پر بات چیت جاری ہے۔