پاکستان کیلئے خطرہ بننے والے دہشت گردوں کے ڈھانچے جہاں بھی ہونیگے، ختم کیے جائینگے، فیلڈ مارشل

راولپنڈی (نمائندہ ڈیلی اردو) پاکستان کے آرمی چیف فیلڈ مارشل عاصم منیر نے اس عزم کا اعادہ کیا ہے کہ پاکستان اور اس کے عوام کے لیے خطرہ بننے والے دہشت گردوں کے ڈھانچے جہاں کہیں بھی موجود ہوں گے، انہیں ختم کیا جائے گا۔

سرکاری خبر رساں ادارے اے پی پی کے مطابق پاکستانی فوج کے شعبہ تعلقات عامہ (آئی ایس پی آر) کی جانب سے جاری بیان میں بتایا گیا کہ فیلڈ مارشل عاصم منیر نے یہ بات جنرل ہیڈکوارٹرز (جی ایچ کیو) راولپنڈی میں 20 ویں نیشنل ورکشاپ بلوچستان کے شرکا سے ملاقات کے دوران کہی۔

آئی ایس پی آر کے مطابق آرمی چیف نے کہا کہ سیکیورٹی فورسز اور قانون نافذ کرنے والے ادارے عوام کی حمایت کے ساتھ بلوچستان میں دیرپا امن کے قیام کے لیے اقدامات جاری رکھیں گے۔

انہوں نے کہا کہ دہشت گردی کے مکمل خاتمے تک دہشت گردوں اور ان کے سہولت کاروں کے خلاف کارروائیاں جاری رہیں گی۔

فیلڈ مارشل عاصم منیر نے اس بات پر زور دیا کہ پاکستان اپنی سرزمین اور عوام کے تحفظ کے لیے پرعزم ہے اور جہاں کہیں بھی دہشت گردوں کا بنیادی ڈھانچہ ملک کے لیے خطرہ بنے گا، اسے ختم کرنے کے لیے اقدامات کیے جائیں گے۔

آئی ایس پی آر کے بیان کے مطابق آرمی چیف نے الزام عائد کیا کہ بیرونی سرپرستی میں کام کرنے والے عناصر بلوچستان میں تشدد کو فروغ دینے، امن و استحکام کو نقصان پہنچانے اور ترقیاتی عمل کو متاثر کرنے کی کوشش کرتے رہے ہیں۔

انہوں نے کہا کہ پاکستان کی مسلح افواج عوام کی حمایت کے ساتھ ایسے عناصر کے عزائم کو ناکام بنانے کے لیے مضبوط اور فیصلہ کن اقدامات جاری رکھیں گی۔

فیلڈ مارشل عاصم منیر نے نیشنل ورکشاپ بلوچستان کے شرکا کو سیکیورٹی صورتحال، قومی سلامتی کے معاملات اور بلوچستان میں امن و ترقی کے لیے جاری اقدامات سے بھی آگاہ کیا۔