پشاور، بنوں اور باجوڑ میں عسکریت پسندوں کی فائرنگ سے تین پولیس اہلکار ہلاک

واشنگٹن (ش ح ط) پاکستان کے شورش زدہ صوبے خیبر پختونخوا کے مختلف علاقوں میں عسکریت پسندوں کی فائرنگ سے پولیس اور سی ٹی ڈی کے تین اہلکار ہلاک ہو گئے۔

پشاور

تھانہ ریگی کی حدود، نادرن بائی پاس اور شاہی بالا کے قریب عسکریت پسندوں نے کاؤنٹر ٹیررازم ڈیپارٹمنٹ (سی ٹی ڈی) کے اہلکار ثناءاللہ کو فائرنگ کا نشانہ بنایا، جس کے نتیجے میں وہ ہلاک ہو گئے۔

بنوں

ضلع بنوں میں فرنٹیئر ریزرو پولیس (ایف آر پی) کے کانسٹیبل ناظم خان ولد قاسم، سکنہ شادیو خاص، مغرب کی نماز کے بعد گھر جا رہے تھے کہ عسکریت پسندوں نے ان پر فائرنگ کی۔ شدید زخمی ہونے کے بعد انہیں ہسپتال منتقل کیا گیا، تاہم زخموں کی تاب نہ لاتے ہوئے وہ ہلاک ہو گئے۔

باجوڑ

تحصیل ماموند کے علاقے مینہ میں عسکریت پسندوں نے سی ٹی ڈی کے ایک اہلکار کو فائرنگ کا نشانہ بنایا۔ پولیس کے مطابق شہید اہلکار کی شناخت سیپور سکنہ مینہ کے طور پر ہوئی ہے۔

پولیس اور سکیورٹی فورسز نے متاثرہ علاقوں کو گھیرے میں لے کر سرچ آپریشن اور تحقیقات کا آغاز کر دیا ہے۔ ملزمان کی گرفتاری کے لیے مختلف مقامات پر چھاپے مارے جا رہے ہیں۔

واضح رہے کہ گزشتہ روز بھی خیبر پختونخوا کے مختلف علاقوں میں پولیس اہلکاروں کو ٹارگٹ کلنگ کا نشانہ بنایا گیا تھا۔ ضلع خیبر کی تحصیل جمرود میں عبدالقیوم اور ضلع باجوڑ تحصیل ماموند کے علاقے خوارو کلے میں رشید عسکریت پسندوں کی فائرنگ سے ہلاک ہوئے تھے۔