پشاور میں ڈرون حملہ، خاتون ہلاک، بچوں سمیت 10 افراد زخمی

پشاور (ڈیلی اردو) پاکستان کے شورش زدہ صوبہ خیبر پختونخوا کے صوبائی داراحکومت پشاور کے نواحی علاقے حسن خیل کے شاہ مت خیل میں مبینہ ڈرون حملے کے نتیجے میں ایک خاتون ہلاک جبکہ خواتین اور بچوں سمیت 10 سے زائد افراد زخمی ہو گئے۔

پولیس کے مطابق دھماکے کے فوراً بعد امدادی کارروائیاں شروع کر دی گئیں اور زخمیوں کو جائے وقوعہ سے نکال کر مختلف طبی مراکز منتقل کیا گیا، جبکہ شدید زخمیوں کو بہتر علاج کے لیے لیڈی ریڈنگ ہسپتال (ایل آر ایچ) منتقل کیا گیا۔

لیڈی ریڈنگ ہسپتال کے ترجمان کے مطابق اب تک ہسپتال لائے گئے پانچ زخمیوں میں تین مرد اور دو خواتین شامل ہیں، جن کی عمریں 15 سے 80 سال کے درمیان ہیں۔

ترجمان نے بتایا کہ دو معمولی زخمیوں کو ابتدائی طبی امداد کے بعد ڈسچارج کر دیا گیا، جبکہ تین زخمی بدستور زیرِ علاج ہیں۔

ذرائع کے مطابق حملے میں مجموعی طور پر خواتین اور بچوں سمیت 10 سے زائد افراد زخمی ہوئے ہیں، جن میں سے متعدد کی حالت تشویشناک بتائی جا رہی ہے۔

واقعے کی نوعیت، حملے کے ذمہ دار عناصر اور اس کی وجوہات کے بارے میں تاحال متعلقہ حکام کی جانب سے کوئی باضابطہ مؤقف سامنے نہیں آیا، جبکہ واقعے کی تحقیقات جاری ہیں۔