پنجاب کے مختلف شہروں میں سی ٹی ڈی کا آپریشن، 15 دہشت گرد گرفتار

لاہور (بیورو رپورٹ) کاؤنٹر ٹیرر ازم ڈپارٹمنٹ (سی ٹی ڈی) نے پنجاب کے مختلف شہروں میں انٹیلی جنس بیسڈ آپریشنز کرتے ہوئے کالعدم تحریک طالبان پاکستان کے انتہائی مطلوب دہشت گرد سمیت 15 دہشتگردوں کو گرفتار کر لیا۔

ترجمان سی ٹی ڈی کے مطابق انٹیلی جنس بیسڈ کارروائیاں لاہور، راولپنڈی، سرگودھا، گوجرانوالہ، ملتان، ٹوبہ ٹیک سنگھ، مظفرگڑھ، اٹک، میانوالی، فیصل آباد اور چنیوٹ میں کی گئیں۔ اس دوران میانوالی سے کالعدم تحریک طالبان پاکستان کا خطرناک دہشت گرد بھی گرفتار کرلیا گیا۔

ترجمان کے مطابق دہشت گردوں سے دھماکہ خیز مواد، خودکش جیکٹ، 18 ڈیٹونیٹر، 47 فٹ حفاظتی فیوز وائر، ایک آئی ای ڈی بم، ایک پرائما کارڈ، موبائل فون اور نقدی برآمد کر لی گئی۔

ترجمان نے بتایا کہ دہشت گردوں کی شناخت حافظ عبدالمالک، نور رحیم، نور الامین، عزیز، ریاض، اکرام خان، اعجاز، عبدالوہاب، یار گل، علی شاہ وغیرہ کے نام سے ہوئی ہے۔ دہشت گرد حساس مقامات پر حملے کی منصوبہ بندی کر رہے تھے۔

ترجمان کے مطابق رواں ماہ میں 714 کومبنگ آپریشنز کے دوران 225 مشتبہ افراد گرفتار کیے، کومبنگ آپریشنز میں 19670 افراد سے پوچھ گچھ کی گئی۔

ترجمان کا کہنا ہے کہ سی ٹی ڈی محفوظ پنجاب کے ہدف پر عمل پیرا ہے، دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔