پولینڈ نے روسی ڈرونز مار گرائے، چار ہوائی اڈے بند

وارسا (ڈیلی اردو) پولینڈ نے یوکرین پر روسی حملوں کے دوران اپنی فضائی حدود کی "بار بار اور غیر معمولی خلاف ورزی" کی مذمت کی ہے اور کہا ہے کہ درجنوں ڈرون نما اشیاء دیکھی گئیں جن میں سے کچھ کو فوج نے مار گرایا ہے۔

پولینڈ کی مسلح افواج کی آپریشنل کمانڈ نے ایک بیان میں کہا کہ روسی حملوں کے بعد ڈرونز کی دراندازی کو "ہمارے شہریوں کی سلامتی کے لیے حقیقی خطرہ" قرار دیا گیا۔ فوج کے مطابق پوڈلاسکی، مازوویکی اور لوبلن کے علاقے سب سے زیادہ متاثر ہوئے ہیں، جبکہ عوام کو گھروں میں رہنے کی تاکید کی گئی ہے۔

پولینڈ کی پولیس نے تصدیق کی ہے کہ مشرقی گاؤں زوسنوکا میں ایک تباہ شدہ ڈرون برآمد ہوا ہے۔ وزیر دفاع ولادیسلاو کوسینیک کامیز کے مطابق پولینڈ مسلسل نیٹو کمانڈ کے ساتھ رابطے میں ہے۔

وزیر اعظم ڈونلڈ ٹسک نے کہا کہ "فوج نے فضائی حدود کی خلاف ورزی کرنے والی اشیاء کے خلاف ہتھیاروں کا استعمال کیا" اور وہ صدر اور وزیر دفاع کے ساتھ مسلسل مشاورت میں ہیں۔

امریکی فیڈرل ایوی ایشن ایڈمنسٹریشن (FAA) کی ویب سائٹ پر شائع نوٹس کے مطابق پولینڈ میں چار ہوائی اڈے، بشمول دارالحکومت وارسا کا سب سے بڑا چوپن ایئرپورٹ، منگل اور بدھ کی درمیانی شب بند رکھے گئے۔ تاہم فوجی کمانڈ نے باضابطہ طور پر یہ تصدیق نہیں کی کہ کن ہوائی اڈوں کو بند کیا گیا۔

یوکرین کے وزیر خارجہ اندری سیبیہا نے اس واقعے پر ردعمل دیتے ہوئے کہا کہ روسی ڈرونز کا پولینڈ میں داخل ہونا صدر ولادیمیر پوٹن کی جانب سے "مغرب کا امتحان" ہے۔ انہوں نے خبردار کیا کہ کمزور ردعمل ماسکو کو مزید جارحانہ اقدامات پر اکسائے گا۔ ان کے مطابق نیٹو کو چاہیے کہ وہ اپنے فضائی دفاعی نظام کو یوکرین کی سرزمین پر ڈرونز اور میزائل روکنے کے لیے استعمال کرے۔

خیال رہے کہ نیٹو کے آرٹیکل 5 کے تحت کسی بھی رکن ملک پر حملہ تمام رکن ممالک پر حملہ تصور کیا جاتا ہے، تاہم اس شق کو متحرک کرنے کے لیے متاثرہ ریاست کو باضابطہ درخواست دینا لازمی ہے۔