چترال، بنوں اور جنوبی وزیرستان میں دہشت گردوں کے مہلک حملے، کئی ہلاکتیں

واشنگٹن (ش ح ط) پاکستان کے شورش زدہ صوبہ خیبر پختونخوا کے مختلف اضلاع میں دہشت گردی کے تین الگ الگ واقعات میں سکیورٹی فورسز اور پولیس کو بھاری جانی و مالی نقصان پہنچنے کی اطلاعات ہیں۔

چترال کے علاقے ارسون میں پاک افغان سرحد کے قریب مبینہ طور پر کالعدم تحریک طالبان پاکستان (ٹی ٹی پی) کے دہشت گردوں نے ایک فوجی پوسٹ پر حملہ کیا اور اسے نذرِ آتش کر دیا۔

 ذرائع کے مطابق اس حملے میں 6 فوجی اہلکار ہلاک ہوگئے ہیں اور متعدد کے زخمی ہوئے۔

مقامی پولیس نے چترال سکاوٹس کے سپاہی فرید کی ہلاکت کی تصدیق کر دی ہے۔

دوسری جانب ضلع بنوں میں لیرا پل کے قریب ہوید روڈ پر مسلح دہشت گردوں کی فائرنگ سے پولیس اہلکار عمر نیاز ہلاک ہو گئے۔ واقعے کے بعد علاقے میں پولیس نے سرچ آپریشن شروع کر دیا ہے۔

اسی طرح جنوبی وزیرستان کے علاقے اعظم ورسک کے نندرون میں مبینہ طور پر کالعدم تحریک طالبان پاکستان (ٹی ٹی پی) کے دہشت گردوں نے ایک فوجی قافلے کو نشانہ بنایا۔ 

سرکاری ذرائع کے مطابق حملے میں 8 سکیورٹی اہلکار ہلاک اور متعدد زخمی ہوگئے جبکہ دو فوجی گاڑیوں کو نقصان پہنچنے کی اطلاعات ہیں۔

تاہم پاکستانی فوج کی جانب سے تاحال اس حوالے سے کوئی باضابطہ بیان جاری نہیں کیا گیا ہے۔ 

پولیس اور سکیورٹی اداروں کے مطابق تمام واقعات کی تحقیقات جاری ہیں اور دہشت گردوں کی تلاش کے لیے مختلف علاقوں میں آپریشنز کیے جا رہے ہیں۔