چلاس میں گلگت اسکاؤٹس کیمپ پر حملہ، صوبیدار ہلاک، 7 اہلکار زخمی

سکردو (م ع) پاکستان کے زیر اہتمام گلگت بلتستان میں گلگت اسکاؤٹس کے کیمپ پر مسلح عسکریت پسندوں نے فائرنگ کر دی۔

واقعے میں صوبیدار خوشداد ہلاک اور سات اہلکار زخمی ہوئے جنہیں سی ایم ایچ ہسپتال منتقل کیا گیا، بعض کی حالت تشویشناک ہے۔

نمائندہ ڈیلی اردو کو سرکاری حکام نے بتایا کہ حملہ آوروں نے چلاس ہڈور کے مقام پر پہاڑ سے کیمپ پر فائرنگ کی۔

واقعے کے بعد علاقے کو گھیرے میں لے کر سرچ آپریشن شروع کر دیا گیا تاکہ حملہ آوروں کو گرفتار کیا جا سکے اور امن و امان قائم رکھا جا سکے۔ حکام مزید تحقیقات کر رہے ہیں۔

حکومت گلگت بلتستان نے واقعے کی مذمت کرتے ہوئے سکیورٹی فورسز کو فوری کارروائی کی ہدایت کی ہے اور شہریوں سے کہا ہے کہ وہ گھبرائیں نہیں اور حکام کے ساتھ تعاون کریں۔