ڈیرہ اسماعیل خان: شدت پسندوں کے حملے میں سیکورٹی فورسز کے 2 اہلکار ہلاک، 2 زخمی

اسلام آباد (ش ح ط) صوبہ خیبر پختونخوا کے ضلع ڈیرہ اسماعیل خان میں شدت پسندوں کے سیکورٹی فورسز پر حملے کے نتیجے میں دو اہلکار ہلاک ہو گئے ہیں۔

ڈیرہ اسماعیل خان کے علاقے کھوئی بہاڑہ میں کیو آر ایف ٹیم پر حملہ، حملے میں سیکیورٹی فورسز کے دو اہلکار ہلاک اور دو زخمی ہوگئے۔#DIKhan #Pakistan

— Shabbir Hussain Turi (@ShabbirTuri) October 28, 2022

سرکاری ذرائع کے مطابق ڈیرہ اسماعیل خان کے علاقہ کھوئی بہارہ میں سیلاب متاثرین کے سروے ٹیم کی سیکیورٹی پہ مامور کیو آر ایف ٹیم پر شدت پسندوں نے حملہ کر دیا۔

ذرائع نے مزید بتایا کہ حملے میں سیکورٹی فورسز کے دو اہلکار موقع پر ہلاک ہوگئے جبکہ دو زخمی ہوگئے۔

حملے میں زخمی ہونے والے دو اہلکاروں کو سی ایم ایچ ڈیرہ اسماعیل خان منتقل کردیا گیا ہے۔

ایسی اطلاع ہے کہ اس فائرنگ میں شدت پسندوں کا بھی جانی نقصان ہوا ہے لیکن اس بارے میں تفصیل معلوم نہیں ہو سکی۔

مقامی افراد کا کہنا تھا کہ اہلکاروں اور عسکریت پسندوں کے درمیان فائرنگ کا تبادلہ کافی دیر تک جاری رہا۔

واقعے کے فوری بعد سیکیورٹی فورسز نے علاقے کو گھیرے میں لیتے ہوئے سرچ آپریشن شروع کر دیا۔