ڈیرہ اسماعیل خان میں سیکورٹی فورسز کا آپریشن، ٹی ٹی پی کے 7 دہشت گرد ہلاک

راولپنڈی (ک م) پاکستان کے شورش زدہ صوبے خیبر پختونخوا کے ضلع ڈیرہ اسماعیل خان کی تحصیل کلاچی میں سیکیورٹی فورسز نے خفیہ اطلاعات کی بنیاد پر ایک کامیاب آپریشن میں کالعدم تحریک طالبان پاکستان (ٹی ٹی پی) کے 7 دہشت گرد ہلاک کر دیے۔ تاہم کارروائی کے دوران پاک فوج کا 34 سالہ نائیک یاسر خان اپنے فرائض کی ادائیگی کے دوران ہلاک ہو گئے۔ 

نائیک یاسر خان ضلع مردان سے تعلق رکھتے تھے اور دشمن کا بہادری سے مقابلہ کیا۔

پاکستانی فوج کے شعبہ تعلقات عامہ (آئی ایس پی آر) کے مطابق دہشت گردوں کے ٹھکانوں کو نشانہ بنانے کے دوران شدید فائرنگ کا تبادلہ ہوا۔ ہلاک دہشت گردوں کے قبضے سے بھاری مقدار میں اسلحہ اور گولہ بارود برآمد کیا گیا، جو علاقے میں دہشت گرد سرگرمیوں کے لیے استعمال ہو رہا تھا۔ علاقے میں ممکنہ دہشت گردوں کی موجودگی کے خاتمے کے لیے سینیٹائزیشن آپریشن جاری ہے۔

آئی ایس پی آر نے کہا کہ قومی ایکشن پلان کے تحت وفاقی ایپکس کمیٹی کی منظور شدہ حکمت عملی “عزمِ استحکام” کے تحت سیکیورٹی فورسز اور قانون نافذ کرنے والے ادارے ملک سے دہشت گردی کے مکمل خاتمے تک کارروائیاں جاری رکھیں گے۔

واضح رہے کہ گزشتہ روز بھی خیبرپختونخوا میں دو الگ الگ آپریشنز کے دوران کالعدم ٹی ٹی پی کے 13 دہشت گرد ہلاک ہوئے تھے۔ ضلع مہمند میں 7 اور ضلع بنوں میں 6 دہشت گردوں کو نشانہ بنایا گیا تھا۔

ڈیرہ اسماعیل خان میں کامیاب کارروائی پر صدرِ مملکت آصف علی زرداری اور وفاقی وزیر داخلہ محسن نقوی نے سیکیورٹی فورسز کو خراجِ تحسین پیش کیا۔ 

آصف علی زرداری نے نائیک یاسر خان کی قربانی کو خراجِ عقیدت پیش کیا اور کہا کہ پوری قوم ان کے اہلِ خانہ کے غم میں شریک ہے۔ 

وفاقی وزیر داخلہ محسن نقوی نے بھی نائیک یاسر خان کے اہلِ خانہ سے ہمدردی کا اظہار کیا اور سیکیورٹی فورسز کی پیشہ ورانہ صلاحیتوں کو سراہا۔