ڈیرہ اسماعیل خان میں فائرنگ، سکیورٹی فورسز کا اہلکار ہلاک

ڈی آئی خان (ڈیلی اردو) پاکستان کے شورش زدہ صوبے خیبرپختونخوا کے ضلع ڈیرہ اسماعیل خان کے علاقے کلاچی بازار میں موٹر سائیکل سوار مسلح افراد کی فائرنگ کے نتیجے میں سکیورٹی فورسز کا ایک اہلکار ہلاک ہو گیا۔

پولیس کے مطابق کلاچی بازار میں موٹر سائیکل سوار شدت پسندوں نے فائرنگ کر کے سکیورٹی فورسز کے اہلکار سیف الرحمن کو نشانہ بنایا، جس کے نتیجے میں وہ موقع پر ہلاک ہو گئے۔

پولیس کا کہنا ہے کہ سیف الرحمن چھٹی پر اپنے گھر آئے ہوئے تھے جب انہیں نشانہ بنایا گیا۔ واقعے کے بعد حملہ آور فرار ہونے میں کامیاب ہو گئے۔

ذرائع کے مطابق واقعے کے بعد سکیورٹی فورسز اور پولیس نے علاقے کو گھیرے میں لے کر سرچ آپریشن شروع کر دیا ہے جبکہ حملہ آوروں کی تلاش جاری ہے۔