ڈیرہ اسماعیل خان: پولیس اور سی ٹی ڈی کی مشترکہ کارروائی، ایک شدت پسند ہلاک

ڈی آئی خان (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع ڈیرہ اسماعیل خان میں پولیس اور سی ٹی ڈی (سینٹرل ٹاسک فورس ڈیپارٹمنٹ) کی مشترکہ کارروائی میں تحریک طالبان پاکستان (ٹی ٹی پی) گنڈاپور گروپ کا ایک شدت پسند ہلاک ہو گیا۔

ڈیلی اردو کے مطابق ڈیرہ اسماعیل خان سی ٹی ڈی ریجن، ضلعی پولیس اور سیکیورٹی فورسز نے مصدقہ خفیہ اطلاع پر کارروائی کی۔ جائے وقوع پر پہنچ کر شدت پسندوں کو گھیرے میں لے لیا گیا، تاہم شدت پسندوں نے اچانک فائرنگ شروع کر دی۔

سیکیورٹی فورسز نے جوابی کارروائی کرتے ہوئے ایک شدت پسند کو ہلاک کر دیا جبکہ اس کے دیگر ساتھی فرار ہو گئے۔

سرچ آپریشن کے دوران ہلاک شدت پسند کی لاش برآمد ہوئی، جس کا تعلق ٹی ٹی پی گنڈاپور گروپ سے بتایا گیا ہے۔ یہ گروپ کھُتی پولیس چیک پوسٹ، پولیس اور سیکیورٹی فورسز پر حملوں میں ملوث تھا۔ ہلاک شدت پسند سے ایس ایم جی اور متعدد کارتوس بھی برآمد ہوئے۔

علاقے میں مزید شدت پسندوں اور سہولت کاروں کی موجودگی کے خدشے کے پیش نظر سرچ آپریشنز اور تفتیش کا دائرہ کار بڑھا دیا گیا ہے۔

انسپکٹر جنرل آف پولیس خیبرپختونخوا ذوالفقار حمید اور ایڈیشنل آئی سی ٹی ڈی نے کامیاب کارروائی پر سی ٹی ڈی اسپیشل ویپنز اینڈ ٹیکٹکس ٹیمز کے جوانوں کو خراجِ تحسین پیش کیا ہے۔