ڈیرہ اسماعیل خان: گیس کمپنی کے پانچ ملازمین نامعلوم افراد کے ہاتھوں اغوا

ڈیرہ اسماعیل خان (ڈیلی اردو)خیبرپختونخواہ کے ضلع ڈیرہ اسماعیل خان کے تھانہ درابن کی حدود میں ڈیرہ ژوب روڈ پر زڑکنی کے قریب نامعلوم مسلح افراد نے سوئی گیس پائپ لائن کمپنی سر ڈگر کیمپ درابن کے پانچ ملازمین کو گاڑی سمیت اغوا کر لیا۔

عینی شاہدین کے مطابق کمپنی کے ملازمین ڈیوٹی سے واپس آرہے تھے کہ اچانک مسلح افراد نے گاڑی کو روکا اور تمام افراد کو زبردستی اپنے ساتھ لے گئے۔ اغوا ہونے والوں میں فورمین خورشید، پنجاب سے تعلق رکھنے والے خالد مشتاق، ڈرائیور رمضان، لکی مروت کے عدنان اور مسیحی ورکر سورج کمار شامل ہیں۔

پولیس ذرائع کا کہنا ہے کہ واقعے کی اطلاع ملتے ہی علاقے میں سرچ آپریشن شروع کر دیا گیا ہے جبکہ اغواکاروں کی گرفتاری کے لیے مختلف مقامات پر ناکہ بندی بھی کی گئی ہے۔ دوسری جانب اس واقعہ کے بعد علاقے میں خوف و ہراس پھیل گیا ہے اور شہریوں نے حکومت سے فوری کارروائی کا مطالبہ کیا ہے۔