کراچی: بوٹ بیسن کے قریب 3 مزدوروں کی تشدد زدہ لاشیں برآمد

کراچی (ڈیلی اردو) کراچی کے معروف علاقے بوٹ بیسن کے قریب پارک سے تین افراد کی تشدد زدہ لاشیں برآمد ہوئی ہیں۔

ریسکیو ذرائع کے مطابق تینوں افراد کی لاشیں بختاور پارک سے ملی ہیں، لاشوں کو پوسٹ مارٹم کے لیے جناح اسپتال منتقل کردیا گیا ہے۔

ایس ایس پی ساؤتھ کا کہنا ہے کہ ابتدائی تحقیقات کے مطابق تینوں افراد بے گھر تھے اور رات گزارنے کے لئے بختاور پارک میں سوئے تھے، تینوں افراد مزدور پیشہ تھے۔

ایس ایس پی ساؤتھ شیراز نذیر کے مطابق مقتولین کو ممکنہ طور پر پتھر یا کسی بھاری چیز سے مارا گیا، جاں بحق افراد میں امشیر افضل اور علی حسن شامل ہیں، امشیر افضل کا آبائی تعلق مردان کے علاقے زرین آباد جب کہ علی حسن فیصل آباد کے علاقے امین ٹاؤن کا رہائشی تھا ایک شخص کی تاحال شناخت نہیں ہوسکی ہے۔

پولیس حکام کا کہنا ہے کہ موت کی وجوہات جاننے کے لیے تحقیقات کا آغاز کر دیا ہے۔