کراچی: سی ٹی ڈی کا آپریشن، ٹی ٹی پی کا مطلوب دہشت گرد ساتھی سمیت گرفتار

کراچی (نمائندہ ڈیلی اردو) پاکستان کے صوبہ سندھ کے صوبائی حکومت کتاچی میں کاؤنٹر ٹیررازم ڈیپارٹمنٹ (سی ٹی ڈی) نے انٹیلی جنس کی بنیاد پر کارروائی کرتے ہوئے حب ریور روڈ کے قریب نیول کالونی سے تحریک طالبان پاکستان (ٹی ٹی پی) کے ایک مطلوب دہشت گرد کو اس کے ساتھی سمیت گرفتار کر لیا۔

ایس ایس پی سی ٹی ڈی عرفان بہادر کے مطابق گرفتار ملزم کی شناخت اسماعیل سواتی کے نام سے ہوئی ہے، جو سی ٹی ڈی کی ریڈ بک میں سیریل نمبر 87 پر درج تھا۔ ملزم ٹی ٹی پی کے لیے فنڈ ریزنگ اور بھتہ خوری میں ملوث رہا ہے۔

پولیس کے مطابق اسماعیل سواتی نے 2023 میں پیرآباد کے علاقے میں بھتہ نہ دینے پر تاجر عبد القیوم قصائی کو ساتھی سمیت ہلاک کیا تھا اور اس مقدمے میں اشتہاری تھا۔ اس کا ایک ساتھی عبدالغنی پہلے ہی پولیس مقابلے میں ہلاک ہو چکا ہے۔

حکام کے مطابق ملزم کراچی سے فرار ہو کر خیبرپختونخوا چلا گیا تھا اور بعد ازاں واپس آنے پر گرفتار کیا گیا۔ وہ ٹی ٹی پی سوات کے دہشت گرد کمال خان کا قریبی ساتھی بھی بتایا جاتا ہے۔

کارروائی کے دوران ایک اور ملزم زاہد اللہ کو بھی گرفتار کیا گیا، جس کے قبضے سے دو پستول اور 10 گولیاں برآمد ہوئیں۔

سی ٹی ڈی کے مطابق ملزمان کے خلاف سندھ آرمز ایکٹ کے تحت مقدمات درج کر کے مزید تفتیش جاری ہے۔