کراچی سے کالعدم تنظیم سپاہ محمد کا مبینہ شدت پسند گرفتار

کراچی (ڈیلی اردو) کراچی کے علاقے گلستان جوہر میں کاونٹر ٹیررازم ڈپارٹمنٹ (سی ٹی ڈی) نے کارروائی کرتے ہوئے کالعدم تنظیم سپاہ محمد سے وابستہ شدت پسند کو گرفتار کرلیا۔

https://twitter.com/ShabbirTuri/status/1580247769058406400?t=4mCzV0ZXTgTpDXmDP6u7FQ&s=19

سی ٹی ڈی نے کالعدم سپاہ محمد کے مبینہ شدت پسند سید ناصر عباس رضوی کو گرفتار کر کے اس کے قبضے سے غیرقانونی اسلحہ اور ایمونیشن برآمد کرنے کا دعویٰ کیا ہے۔

ترجمان سی ٹی ڈی کے مطابق ملزم پولیس کو انتہائی مطلوب تھا اور واردات کی نیت سے وہاں موجود تھا۔

ملزم نے گلبرگ میں مخالف تنظیم سے وابستہ اعجاز نامی شخص کو ہلاک کیا۔ ترجمان نے دعویٰ کیا ہے کہ ملزم نے انچولی میں بھی اغوا اور قتل کی واردات کی۔

ملزم نے توحید مسجد پر بھی فائرنگ کی جس کے نتیجے میں ایک شخص ہلاک اور تین زخمی ہوئے تھے۔

ملزم کراچی میں رئیل اسٹیٹ کا کام بھی کر رہا تھا اور اپنے ساتھیوں کی گرفتاری کے بعد لاہور میں روپوش ہوگیا تھا۔

سی ٹی ڈی کے مطابق ملزم کالعدم تنظیم کے لڑکوں کو منظم کرنے میں بھی مصروف تھا۔