کراچی میں افغانستان سے لایا گیا 2 ہزار کلوگرام بارودی مواد برآمد، 3 دہشت گرد گرفتار

کراچی (ڈیلی اردو) پاکستان کے قانون نافذ کرنے والے اداروں نے کراچی میں کارروائی کرتے ہوئے دو ہزار کلوگرام سے زائد دھماکا خیز مواد برآمد کر لیا اور تین دہشت گردوں کو گرفتار کر لیا، حکام نے اتوار کو بتایا۔

ایڈیشنل انسپکٹر جنرل کاؤنٹر ٹیررازم ڈیپارٹمنٹ (سی ٹی ڈی) ذوالفقار لارک اور ڈی آئی جی سی ٹی ڈی غلام اظفر مہیسر نے پریس کانفرنس میں بتایا کہ یہ کارروائی کراچی کے علاقے بلدیہ رئیس گوٹھ میں کی گئی، جہاں ایک مکان سے بڑی مقدار میں تیار دھماکا خیز مواد برآمد ہوا۔

حکام کے مطابق کارروائی کے دوران ایک دہشت گرد کو موقع پر گرفتار کیا گیا، جس کی نشاندہی پر شہر کے مختلف علاقوں میں مزید چھاپے مارے گئے، جہاں سے دو مزید دہشت گردوں کو گرفتار کیا گیا۔

ڈی آئی جی سی ٹی ڈی غلام اظفر مہیسر کے مطابق ابتدائی تفتیش سے معلوم ہوا ہے کہ دھماکا خیز مواد افغانستان سے بلوچستان کے راستے کراچی منتقل کیا گیا تھا۔ دہشت گردوں نے شہر سے تقریباً 35 سے 40 کلومیٹر کے فاصلے پر ایک مکان کرائے پر لے رکھا تھا۔

انہوں نے بتایا کہ کارروائی کے دوران 30 سے زائد پلاسٹک ڈرمز اور پانچ دھاتی گیس سلنڈرز برآمد کیے گئے، جن میں کمرشل ایکسپلوسیو اور مکس دھماکا خیز مواد شامل تھا، جو مکمل طور پر تیار حالت میں تھا۔

حکام کا کہنا ہے کہ ابتدائی شواہد کے مطابق اس منصوبے کے پیچھے کالعدم تنظیم بلوچستان لبریشن آرمی (بی ایل اے) سے تعلق رکھنے والے دہشت گرد ملوث ہیں۔ ان کے مطابق منصوبہ بیرونِ ملک تیار کیا گیا تھا، جبکہ سہولت کاروں اور مبینہ ہینڈلرز کی نشاندہی کر لی گئی ہے، جن کی گرفتاری کے لیے مزید کارروائیاں جاری ہیں۔

سی ٹی ڈی کے مطابق گرفتار دہشت گردوں کی شناخت جلیل عرف فرید، نیاز عرف کنگ اور حمدان عرف فرید کے نام سے ہوئی ہے۔ حکام کا کہنا ہے کہ کارروائی رات کے وقت کی گئی، اس لیے ماہرین کی رپورٹس اور مختلف اداروں کی تصدیق کے بعد مزید تفصیلات جاری کی جائیں گی۔