کراچی میں مختلف کارروائیوں کے دوران 4 مبینہ دہشتگرد ہلاک، ایک گرفتار

کراچی (ڈیلی اردو) کراچی میں مختلف علاقوں میں پولیس اور کاؤنٹر ٹیررازم ڈیپارٹمنٹ کی کارروائیوں اور مبینہ مقابلوں کے دوران چار افراد ہلاک جبکہ ایک کو گرفتار کرلیا گیا۔ پولیس کے مطابق کارروائیوں کے دوران اسلحہ، گولیاں، موبائل فونز اور ایک مبینہ مسروقہ موٹر سائیکل بھی برآمد ہوئی۔

سی ٹی ڈی ذرائع کے مطابق منگھوپیر کے علاقے غازی گوٹھ کے قریب دہشتگردوں کی موجودگی کی اطلاع پر کارروائی کی گئی۔ اہلکار مشتبہ ٹھکانے کے قریب پہنچے تو وہاں موجود افراد نے فائرنگ کردی، جس پر جوابی کارروائی میں دو افراد ہلاک ہوگئے۔

سی ٹی ڈی کے مطابق ہلاک افراد کی لاشیں جناح اسپتال منتقل کی گئیں، جہاں ان کی شناخت 23 سالہ یحییٰ ولد عبدالواحد اور ہلال ولد سید محمد کے نام سے ہوئی۔ حکام کا دعویٰ ہے کہ دونوں کا تعلق کالعدم بلوچ لبریشن فرنٹ سے تھا اور وہ تنظیم میں کمانڈروں کی حیثیت سے کام کر رہے تھے۔

دوسرے واقعے میں وسطی ضلع کے علاقے لیاقت آباد میں تھری ہٹی فلائی اوور کے قریب سروس روڈ پر پولیس اور مسلح افراد کے درمیان فائرنگ کا تبادلہ ہوا۔ پولیس کے مطابق مقابلے کے دوران ایک شخص ہلاک ہوگیا جبکہ اس کا ساتھی اندھیرے کا فائدہ اٹھاتے ہوئے فرار ہوگیا۔

پولیس نے ہلاک شخص کے قبضے سے 30 بور پستول، دو گولیاں، 1200 روپے نقد، تین موبائل فونز اور ایک یونیک 70 موٹر سائیکل برآمد کرنے کا دعویٰ کیا ہے۔ فرار ہونے والے شخص کی تلاش کے لیے کارروائی شروع کردی گئی۔

ایک اور کارروائی میں پولیس نے انٹیلی جنس اطلاع پر سندباد روڈ پر ناکہ بندی کی۔ پولیس کے مطابق دو موٹر سائیکل سواروں کو رکنے کا اشارہ کیا گیا تو انہوں نے مبینہ طور پر فائرنگ کردی، جس پر اہلکاروں نے جوابی کارروائی کی۔

فائرنگ کے نتیجے میں ایک مشتبہ شخص زخمی ہوگیا جبکہ دوسرے کو گرفتار کرلیا گیا۔ پولیس کے مطابق زخمی شخص کو اسپتال منتقل کیا جارہا تھا کہ وہ راستے میں دم توڑ گیا۔

پولیس نے موقع سے 70 سی سی موٹر سائیکل اور 30 بور پستول برآمد کیا۔ حکام کے مطابق موٹر سائیکل مبینہ طور پر پیرآباد تھانے کی حدود سے چھینی گئی تھی۔

گرفتار شخص کی شناخت اطہر چانڈیو ولد دیدار جبکہ ہلاک ہونے والے کی شناخت مظفر چانڈیو ولد شیرل چانڈیو کے نام سے کی گئی۔ پولیس کا کہنا ہے کہ دونوں کا تعلق چانڈیو گینگ سے تھا۔

پولیس ریکارڈ کے مطابق مظفر چانڈیو کے خلاف کراچی کے مختلف تھانوں میں اسلحہ رکھنے، ڈکیتی، موٹر سائیکل چوری، پولیس اہلکار پر حملے سمیت آٹھ مقدمات درج تھے۔

پولیس نے گرفتار شخص سے تفتیش شروع کردی ہے، جس کے دوران گینگ کے دیگر ارکان، ممکنہ ساتھیوں اور مختلف وارداتوں میں مبینہ ملوث ہونے سے متعلق معلومات حاصل کرنے کی کوشش کی جارہی ہے۔