کراچی میں چینی ڈینٹل کلینک پر فائرنگ کا سہولت کار ساتھی سمیت گرفتار

کراچی (ڈیلی اردو) کاؤنٹر ٹیررزم ڈیپارٹمنٹ (سی ٹی ڈی) نے کراچی کے علاقے مبینہ ٹاون میں کارروائی کرتے ہوئے صدر میں چینی ڈینٹل کلینک پر فائرنگ کا سہولت کار ساتھی سمیت گرفتار کرلیا ہے۔

گرفتار ملزمان کا ایک اور ساتھی احمد خشک پہلے ہی گرفتار ہو چکا ہے اور گرفتار مبینہ شدت پسندوں کا تعلق کالعدم تنظیم سے ہے جبکہ ملزمان کے قبضے سے اسلحہ برآمد کرلیا گیا ہے۔

انچارج سی ٹی ڈی مظہر مشوانی نے کہا کہ گرفتار ملزمان میں موٹرسائیکل سوار ساتھی اور سہولت کار شامل ہیں۔

مظہر مشوانی نے کہا کہ واقعے کے وقت نبیل احمد موٹرسائیکل پر سوار تھا، ملزمان نے ڈینٹل کلینک پر فائرنگ کرکے غیر ملکی شخص کو قتل کردیا تھا۔

انہوں نے کہا کہ ملزمان کو چینی ڈینٹل کلینک پر ہونے والے مقدمے میں باضابطہ گرفتار کیا گیا۔

اس سے قبل بھی ایک ملزم کو گرفتار کیا تھا، جو ملیر قائد آباد کے علاقے میں روپوش تھا، جس کے قبضے سے فائرنگ میں استعمال کی جانے والی پستول بھی برآمد ہوئی تھی۔

ذرائع کا دعویٰ تھا کہ ملزم کا تعلق کالعدم تنظیم آجوئی سنگر سے ہے تاہم فائرنگ کے واقعے میں چینی نژاد پاکستانی ڈاکٹر ہلاک اور چینی نژاد پاکستانی مرد اور خاتون زخمی ہوئے تھے۔