کراچی: کالعدم ٹی ٹی پی کے ڈرون سپلائی نیٹ ورک کا اہم رکن گرفتار

کراچی (نمائندہ ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) اور وفاقی حساس ادارے نے کراچی میں ایک بڑی اور اہم مشترکہ کارروائی کرتے ہوئے کالعدم تحریکِ طالبان پاکستان (ٹی ٹی پی) کے ڈرون سپلائی نیٹ ورک کے ایک اہم رکن کو گرفتار کر لیا ہے۔

ترجمان سی ٹی ڈی کے مطابق گرفتار ملزم کی شناخت طاہر کے نام سے ہوئی ہے، جو افغانستان میں موجود کالعدم ٹی ٹی پی کے مبینہ فعال رکن طلال عرف زید بلوچ کا سگا بھائی بتایا جاتا ہے۔ حکام کے مطابق ملزم طلال کا نام سی ٹی ڈی کی انتہائی مطلوب افراد کی ریڈ بک میں بھی شامل ہے۔

پولیس اور انٹیلی جنس حکام کے مطابق گرفتار ملزم دہشت گرد نیٹ ورک کو جدید ڈرون ٹیکنالوجی، الیکٹرانکس آلات اور دھماکا خیز مواد کی سپلائی میں ملوث تھا۔ ابتدائی تحقیقات میں انکشاف ہوا ہے کہ ملزم اپنے بھائی کی ہدایت پر مختلف ذرائع سے یہ سامان حاصل کر کے کالعدم تنظیم تک پہنچاتا تھا۔

حکام کے مطابق کارروائی کے دوران ملزم کے قبضے سے 2 کلو گرام بارودی مواد، ایک ڈرون اور ریموٹ کنٹرول آلات برآمد کیے گئے ہیں۔ سکیورٹی ذرائع کا کہنا ہے کہ یہ سامان مبینہ طور پر ڈرون حملوں اور آئی ای ڈی (Improvised Explosive Devices) کی تیاری میں استعمال کیا جانا تھا۔

تحقیقات کے مطابق ملزم کراچی کے مختلف تجارتی مراکز، جن میں صدر اور بولٹن مارکیٹ شامل ہیں، کے علاوہ آن لائن پلیٹ فارمز کے ذریعے بھی الیکٹرانک پرزہ جات اور دیگر حساس سامان حاصل کرتا تھا۔

حکام نے بتایا کہ اس نیٹ ورک کے ذریعے حاصل کیا گیا ڈرون ساز و سامان دہشت گرد کارروائیوں میں استعمال ہونے کا خدشہ تھا، تاہم سکیورٹی اداروں نے بروقت کارروائی کرتے ہوئے منصوبہ ناکام بنا دیا۔

سی ٹی ڈی نے ملزم کے خلاف مقدمہ درج کر کے مزید تفتیش شروع کر دی ہے۔ ابتدائی انکشافات کی روشنی میں نیٹ ورک کے دیگر سہولت کاروں اور ممکنہ رابطوں کی تلاش کے لیے خصوصی ٹیمیں تشکیل دے دی گئی ہیں، جو مختلف علاقوں میں چھاپے مار رہی ہیں۔

سکیورٹی حکام کے مطابق اس کارروائی کو دہشت گرد نیٹ ورکس کے خلاف ایک اہم پیش رفت قرار دیا جا رہا ہے، جس سے شہر میں ممکنہ بڑے حملے کو روکا گیا۔