کرم: سرحدی فائرنگ، 3 ایف سی اہلکار ہلاک، 4 زخمی

کرم (نمائندہ ڈیلی اردو) پاکستان کے قبائلی ضلع لوئر کرم کے علاقے شبک میں شدت پسندوں اور سرحد پار فائرنگ کے نتیجے میں 122 ونگ کے 3 فرنٹیئر کور (ایف سی) اہلکار ہلاک جبکہ 4 زخمی ہو گئے ہیں۔

سیکیورٹی ذرائع کے مطابق لوئر کرم اور سینٹرل کرم میں دہشت گردی کے واقعات میں مسلسل اضافہ ہو رہا ہے۔ شبک بارڈر پوسٹ پر اچانک ہونے والی فائرنگ میں ایف سی اہلکار نشانہ بنے، جبکہ زخمیوں کو فوری طور پر قریبی طبی مرکز منتقل کر دیا گیا۔

اطلاعات کے مطابق افغانستان کی جانب سے اچانک کی گئی فائرنگ کے دوران اہلکاروں کو شدید نقصان پہنچا۔

حکام نے کہا ہے کہ شدت پسندوں اور سرحدی حملوں کے خلاف آپریشنز جاری ہیں تاکہ فوجی اور شہری علاقوں میں تحفظ کو یقینی بنایا جا سکے۔