کرم: سینٹرل کرم میں فوج پر خونریز حملہ، 3 اہلکار ہلاک، 10 شدید زخمی

واشنگٹن (ش ح ط) پاکستانی صوبے خیبر پختونخوا میں افغانستان کے ساتھ سرحد کے قریب قبائلی ضلع کُرم میں دہشت گردوں کے حملے میں تین فوجی ہلاک اور دس زخمی ہو گئے۔

ڈیلی اردو کو سرکاری ذرائع سے موصول ہونے والی اطلاعات کے مطابق قبائلی ضلع کرم کی تحصیل سینٹرل کرم میں سکیورٹی فورسز پر دہشت گردوں کے خونریز حملے میں 3 فوجی ہلاک اور 10 شدید زخمی ہوگئے۔ جن میں بعض زخمیوں کی حالت تشویشناک بتائی جاتی ہے۔ اس حملے کے دوران دو اہلکار لاپتہ ہو گئے، جو بعد میں ہیڈ کوارٹر پہنچ گئے۔

اس پاکستانی علاقے میں ماضی میں کالعدم تحریک طالبان پاکستان سب سے زیادہ فعال عسکریت پسند گروپ رہا ہے اور اس کے عسکریت پسند برسوں سے ملکی سکیورٹی فورسز پر خونریز حملے کرتے آئے ہیں۔

نمائندہ کے مطابق فوجی ہلاکتوں کا سبب بننے والے اس حملے کی ابھی تک کسی بھی عسکریت پسند تنظیم یا مسلح گروپ نے ذمے داری قبول نہیں کی۔

فوج کے شعبہ تعلقات عامہ آئی ایس پی آر نے اس واقعے کے بارے میں ابھی تک کوئی بیان جاری نہیں کیا۔

سرکاری ذرائع کا کہنا ہے کہ عسکریت پسندوں کے حملے میں ہلاک ہونے والوں کی شناخت طاہر، اسد اور اعجاز کے نام سے ہوئی ھے جبکہ زخمی اہلکاروں کی شناخت حوالدار عمر شاہد، نائیک عرفان، شکیل احمد، سپاہی محمد رحمن، وحید، ذاکر اللہ ،ایاز الدین، سید کریم، وکیل اور جاوید کے نام سے ظاہر کی گئی ہے۔

سرکاری ذرائع نے بتایا کہ ہلاک ہونے والوں کی لاشیں اور زخمی اہلکاروں کو ٹل اور پشاور کے ملٹری ہسپتالوں میں منتقل کر دیا گیا جبکہ سیکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔ اس واقع کے بعد سیکیورٹی مزید سخت کر دی گئی ہے۔