کرم میں دہشت گردوں کے حملے میں 4 شہری ہلاک، 15 پولیس اہلکاروں سمیت 40 افراد زخمی

پاراچنار (ڈیلی اردو رپورٹ) پاکستان کے شورش زدہ صوبہ خیبر پختونخوا کے قبائلی ضلع کرم کے علاقے میرباغ میں پولیس چیک پوسٹ پر دہشت گردوں کے حملے کے بعد سکیورٹی فورسز اور دہشت گردوں کے درمیان شدید جھڑپوں میں 15 پولیس اہلکاروں سمیت 40 سے زائد افراد زخمی ہوگئے، جبکہ خواتین سمیت 4 شہری ہلاک ہوگئے۔

سرکاری ذرائع کے مطابق دہشت گردوں نے میرباغ پولیس چیک پوسٹ کو نشانہ بنایا، جس کے بعد سکیورٹی فورسز اور حملہ آوروں کے درمیان شدید فائرنگ کا تبادلہ شروع ہوگیا۔ 

جھڑپوں کے دوران دہشت گردوں کی جانب سے آبادی پر اندھا دھند مارٹر گولہ باری بھی کی گئی، جس کے نتیجے میں متعدد شہری زخمی ہوئے۔

مارٹر گولے گرنے سے خواتین سمیت 3 شہری ہلاک ہوگئے، جبکہ علاقے میں پھیلے خوف و ہراس کے دوران ایک خاتون دل کا دورہ پڑنے سے انتقال کر گئیں، جس کے بعد ہلاکتوں کی مجموعی تعداد 4 ہوگئی۔

تمام زخمیوں کو علاج کے لیے ڈی ایچ کیو ہسپتال پاراچنار منتقل کر دیا گیا ہے، جہاں ہسپتال ذرائع کے مطابق متعدد زخمیوں کی حالت تشویشناک ہے۔

واقعے کے بعد علاقے میں کشیدگی پھیل گئی جبکہ سکیورٹی فورسز نے حساس مقامات کا کنٹرول سنبھال کر سرچ آپریشن شروع کر دیا ہے۔ 

پولیس حکام کا کہنا ہے کہ حملہ آوروں کی شناخت اور گرفتاری کے لیے کارروائیاں جاری ہیں۔

دوسری جانب کالعدم تحریک طالبان پاکستان (ٹی ٹی پی) کے کاظم گروپ نے حملے کی ذمہ داری قبول کرنے کا دعویٰ کیا ہے۔

مقامی مساجد سے اعلانات کے بعد قبائلی مشران اور عمائدین سفید جھنڈے اٹھا کر میدان میں آگئے ہیں اور فائر بندی کے لیے کوششیں شروع کر دی ہیں تاکہ مزید جانی نقصان سے بچا جا سکے۔